ភ្នំពេញ: មកទល់ពេលនេះគេមិនទាន់ឃើញតារាសម្ដែងស្រីល្បីឈ្មោះ អ្នកនាងសឿ សុធារ៉ា រំលេចស្នាដៃថ្មីឡើយទេ ដោយសារតែនាងបញ្ជាក់ថាមិនទាន់ពេលទទួលយកការសម្ដែងពេញលេញ។ យ៉ាងណាមិញកាលពីយប់ថ្ងៃទី១១ តុលាមុននេះ គេឃើញនាងបង្ហាញមុខយ៉ាងក្រឡឺមចេញថត MV ថ្មីរបស់ផលិតកម្មឌីភី ដែលMV បទនេះនឹងគ្រោងបង្ហោះលើនៅលើផេករបស់ផលិតកម្មឌីភី និងYoutube ក្នុងពេលដ៏ខ្លី។
បទចម្រៀងដែលអ្នកនាង សឿ សុធារ៉ា ទទួលសម្ដែងនោះមានចំណងជើងថា«តួនាទីស្វាមី» ដែលបកស្រាយដោយលោក កុយ ស៊ីឌឿន ម្ចាស់ផលិតកម្មឌីភីដោយផ្ទាល់។ បទនេះឆ្លុះបញ្ចាំងពីជីវិតក្រីក្ររបស់ប្ដីប្រពន្ធមួយគូ ដែលចាប់ដៃគ្នាតាំងពីភាពក្រីក្រ ប៉ុន្តែដោយសារការតស៊ូ បានធ្វើឲ្យពួកគេទាំងពីរក្លាយជាអ្នកស្ដុកស្ដម្ភ។ អ៊ីចឹងហើយទើបគេឃើញMV បទនេះ តម្រូវឲ្យសឿ សុធារ៉ា យំយែក និងសម្ដែងជាតួកម្សត់ក្នុងពេលស្ថិតក្នុងជីវភាពក្រលំបាក និងបានប្រែក្លាយជាភរិយាអ្នកមាន រស់នៅឡូយឆាយ ក្រោយពេលស្វាមីទទួលជោគជ័យលើអាជីពការងារ។ បទនេះត្រូវបានគេកត់សម្គាល់ថាមានខ្លឹមសារចាក់ដោតអារម្មណ៍មហាជន និងទទួលបានការគាំទ្រខ្ពស់ តាំងពីបានបង្ហោះជាសំឡេងនៅផេករបស់ឌីភី និងលើ Youtube ។ បទនេះ ក៏ជាបទថ្មីរបស់ផលិតកម្មឌីភី បន្ទាប់ពីបទ«ថែខ្លួនពេលអូនទៅកូរ៉េ» ត្រូវបានទទួលការគាំទ្រនៅលើប្រព័ន្ធYoutube នោះផងដែរ។
លោកកុយ ស៊ីឌឿន បានអះអាងថាបទ«តួនាទីស្វាមី» ជាបទខ្លាំងមួយរបស់ផលិតកម្មឌីភី ទើបតម្រូវឲ្យលោកសម្រាំងយកអ្នកនាងសឿ សុធារ៉ា ដើម្បីរំលេចខ្លួនជាតួឯកនៅក្នុងបទនេះ។ លោកថាអ្នកនាង សឿ សុធារ៉ា នៅតែសម្ដែងបានល្អ បើទោះជាអ្នកនាងខកខានការសម្ដែងអស់មួយរយ:ធំ។ ក្នុងនោះលោកក៏បង្ហាញការកោតសរសើរផងដែរ ដែលតារាស្រីរូបនេះ យល់ព្រមសម្ដែងក្នុងបទចម្រៀងរបស់លោក ដើម្បីរំលេចនូវការសម្ដែងជាថ្មី។
អ្នកនាងសឿ សុធារ៉ា បានអះអាងថា ហេតុផលដែលអ្នកនាងទទួលសម្ដែង MV បទនេះ គឺបន្ទាប់ពីនាងបានស្ដាប់អត្ថបទបទចម្រៀង ហើយយល់ថាបទនេះត្រូវនឹងបរិបទនៅក្នុងសង្គមភាគច្រើន ដែលស្ដែងពីការតស៊ូរបស់ស្វាមីភរិយាគំរូ។ នាងរំពឹងមិនខុសគ្នាថាការសម្ដែងបើកឆាកទំព័រសិល្ប:របស់ខ្លួននឹងមានការចាប់អារម្មណ៍ពីសំណាក់មហាជន នៅពេលMV បទនេះត្រូវបានបង្ហោះជាសាធារណ:។ យ៉ាងណាមិញនាងថាការសម្ដែងបទនេះ ក៏មិនសូវបានត្រៀមខ្លួនជាមុននោះដែរ ដោយសារតែខាងផលិតកម្មទើបតែបានទាក់ទង ហើយក្រោយពីពេញចិត្តបទចម្រៀងក៏មកសម្ដែងដោយគ្មានការគ្រោងទុក។
តោះសាកស្ដាប់បទចម្រៀង«តួនាទីស្វាមី»ដែលសម្ដែងដោយ លោកកុយ ស៊ីឌឿន និងអ្នកនាងសឿ សុធារ៉ា ទៅមើល តើមានខ្លឹមសារ និងអត្ថន័យពីរោះកម្រិតណា?
មតិយោបល់