កណ្តាលៈ ករណីគ្រោះថ្នាក់ចរាចរណ៍មួយបានកើតឡើង រវាងម៉ូតូនិងកង់ របួសធ្ងន់ស្រាល៣នាក់។
ហេតុការណ៍បានកើតឡើងនៅវេលាម៉ោង២ និង២០នាទីរសៀល ថ្ងៃទី២៨ ខែមិថុនា ឆ្នាំ២០១៧ នៅលើកំណាត់ផ្លូវលេខ១១០ ភូមិឬស្សីស្រុក ឃុំឈើទាល ស្រុកកៀនស្វាយ។

ជនបង្កមានឈ្មោះ នៅ សេន ភេទប្រុស អាយុ៣២ឆ្នាំ មុខរបបរកម្មករសំណង់ក្នុងក្រុមហ៊ុនវឌ្ឈនះឬស្សីស្រុក ស្នាក់នៅភូមិផ្លូវមាស ឃុំផ្លូវមាស ស្រុករតនៈមណ្ឌល ខេត្តបាត់ដំបង មកស្នាក់នៅនិងធ្វើការក្នុងក្រុមហ៊ុនវឌ្ឍនះ។ ចំណែកអ្នកជិះកង់ទាំង២នាក់ ទី១ឈ្មោះ អាន ស្រីឃីម ភេទស្រី អាយុ១៣ឆ្នាំ មុខរបរសិស្ស ស្នាក់នៅភូមិឈើទាល ឃុំឈើទាល ស្រុកកៀនស្វាយ(របួសស្នាមដៃជើងនិងដងខ្លួន) និងទី២ឈ្មោះ អាន ចុងអ៊ីន ភេទស្រី អាយុ១២ឆ្នាំ មុខរបរសិស្ស ស្នាក់នៅជាមួយគ្នា បងប្អូនបង្កើត(របួសស្នាម ដៃជើងនិងដងខ្លួន)។

មុនពេលកើតហេតុ ជនរងគ្រោះបានជិះកង់ឌុបគ្នា២នាក់បងប្អូនទៅសាលារៀនឯកជន ដោយមានទិសដៅពីកំពង់ស្វាយទៅច្បារអំពៅ(ពីក្រោមទៅលើ)ពេលមកដល់ចំណុចកើតហេតុ ស្រាប់តែភាគីម៉ូតូបង្កជិះទិសដៅស្របគ្នា មកពីក្រោយដោយមានស្ថានភាពស្រវឹងស្រានិងមានល្បឿនលឿនមកបុកកង់ជនរងគ្រោះពីក្រោយ បណ្ដាលឲ្យដួលកង់និងម៉ូតូ រងរបួសទាំង៣នាក់តែម្តង។
ជនរងគ្រោះត្រូវបានក្រុមគ្រួសារបានបញ្ជូនទៅព្យាបាលនៅមន្ទីរពេទ្យ។

ករណីខាងលើនេះ ប៉ុស្តិ៍នគរបាលឈើទាលបានយកមធ្យោបាយទាំង២មករក្សាទុកនៅប៉ុស្តិ៍រង់ចាំដោះស្រាយគ្នាពេលក្រោយទៅតាមនីតិវិធីបន្ត៕