បន្ទាយមានជ័យ៖ ពិរុទ្ធជន ទណ្ឌិត និងជនជាប់ចោទដែលកំពុងបន្តជាប់ឃុំនៅក្នុងពន្ធនាគារខេត្តបន្ទាយមានជ័យ ប្រមាណជាង១០០០នាក់ នៅព្រឹកថ្ងៃទី០៧ខែមេសាឆ្នាំ២០១៦ បានទទួលអំណោយពីសប្បុរសជនក្នុងខេត្ត។
លោក ហ៊ិន សុផល ប្រធានពន្ធនាគារខេត្តបន្ទាយមានជ័យ បានឲ្យដឹងថា បច្ចុប្បន្នអ្នកជាប់ឃុំមានចំនួន១១៤៩នាក់ ស្រី១១៨នាក់ ។កុមារតាមម្តាយចំនួន១០នាក់ ស្ត្រីមានផ្ទៃពោះចំនួន២នាក់។
លោក បន្តថា ចំនួននេះគឺមានការកើនជារៀងរាល់ថ្ងៃ ហើយការកើនភាគច្រើនជាជនជាប់ពាក់ព័ន្ធ នឹងករណីគ្រឿងញៀន។
ថ្លែងសំណេះសំណាលនៅក្នុងឱកាសសួរសុខទុក្ខលោកឧកញ៉ា ហង្ស ស៊ីផា បានលើកឡើងថា ដោយសារតែគិតខុសនិងភាពឆេវឆាវខ្វះការពិចារណាប្រព្រឹត្តខុស និងច្បាប់ទើបត្រូវជាប់នៅទីនេះ តែបងប្អូនសប្បុរសជនមិនរើសអើងទេ និងសុំឲ្យកែខ្លួនដើម្បីក្លាយជាប្រជាពលរដ្ឋល្អក្នុងសង្គមឡើងវិញ។ ពន្ធនាគារមិនមែនជាកន្លែងដែលធ្វើទារុណកម្មនោះទេ តែវាជាកន្លែងអប់រំឲ្យបងប្អូនទាំងអស់គ្នាទទួលស្គាល់នូវកំហុសរបស់ខ្លួន ហើយកែប្រែ ។
ជាមួយនោះលោកឧកញ៉ាក៏បានជូនពរដល់បងប្អូនដែលជាប់ឃុំទាំងអស់ ក្នុងឱកាសឆ្នាំថ្មីឲ្យទទួលបានសុខភាពល្អ កម្លាំងពលំមាំមួន ជៀសផុតពីជំងឺដង្កាត់ផ្សេងៗ៕
មតិយោបល់