កណ្តាលៈ គ្រោះថ្នាក់ចរាចរណ៍មួយបង្កឲ្យមានការភ្ញាក់ផ្អើល ខណៈដែលរថយន្ត បុកជាមួយរថយន្ត លឺដូចរន្ទះ បណ្តាលឲ្យរបួសធ្ងន់ម្នាក់។

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង ៣និង១០នាទីទៀបភ្លឺ ឈានចូលថ្ងៃទី៣០ ខែសីហា ឆ្នាំ២០១៧ នៅលើផ្លូវជាតិលេខ១ ក្នុងចន្លោះគីឡូម៉ែត្រលេខ២៣-២៤ ចំណុចភូមិដីឥដ្ឋ ឃុំដីឥដ្ឋ ស្រុកកៀនស្វាយ ខេត្តកណ្តាល។

នគរបាលចរាចរណ៍ស្រុកកៀនស្វាយបានអោយដឹងថា ករណីនេះ បង្កឡើងដោយរថយន្តម៉ាកNISSAN ពណ៌ ស ប្រភេទសណ្តោងរ៉ឺម៉ក ពាក់ស្លាកលេខ ភ្នំពេញ3A-7930 បើកបរដោយជនមិនស្គាល់អត្តសញ្ញាណ ដែលបើកបរមានទិសដៅពីអ្នកលឿងទៅភ្នំពេញ ពេលបើកមកដល់ចំណុចកើតហេតុខាងលើបានបុកជាមួយរថយន្តម៉ាកFUSO ពាក់ស្លាកលេខ ស្វាយរៀង 3A-0707 បើកបរដោយឈ្មោះ ប៊ុត ធារ័ត្ន ភេទប្រុស អាយុ៣០ឆ្នាំ មានទីលំនៅភូមិក្រាំងក្អុក ឃុំកំពង់សឹង ស្រុកព្រះស្តេច ខេត្តព្រៃវែង ដោយមានអ្នករួមដំណើរម្នាក់ឈ្មោះ គីម រ៉ាឆាន់ ភេទប្រុស អាយុ២៥ឆ្នាំ មានទីលំនៅភូមិកំពង់រោទ៍ ឃុំកំពង់រោទ៍ ស្រុកកំពង់រោទ៍ ខេត្តស្វាយរៀង ដែលបើកមានទិសដៅផ្ទុយគ្នា បណ្តាលឲ្យរងរបួសធ្ងន់អ្នកបើករថយន្តឈ្មោះ ប៊ុន ធារ័ត្ន និងរបួសស្រាលអ្នករួមដំណើរឈ្មោះ គីម រ៉ាឆាន់ បញ្ជូនទៅព្យាលបាលនៅមន្ទីរពេទ្យភ្នំពេញ រថយន្តខូចធ្ងន់២គ្រឿង។

ក្រោយពេលកើតហេតុ អ្នកបើកបររថយន្ត សណ្តោងរ៉ឺម៉កបានរត់គេចខ្លួនបាត់។ រថយន្តទាំង២គ្រឿងយកមករក្សាទុកជា ភស្តុតាងនៅអធិការដ្ឋាននគរបាលស្រុកកៀនស្វាយ។ មូលហេតុ មកពីអ្នកបើក រថយន្តNISSAN សណ្តោងរ៉ឺម៉កធ្វេសប្រហែស មិនប្រកាន់ស្តាំ៕