ភ្នំពេញៈ ជនសង្ស័យម្នាក់ ត្រូវបានសមត្ថកិច្ចឃាត់ខ្លួនពាក់ពន្ធ័ករណីរំលោភ​លើទំនុកចិត្តយកម៉ូតូ កាលពីថ្ងៃទី២៩ ខែកញ្ញា ឆ្នំា២០១៧ វេលាម៉ោង៩ព្រឹក ត្រង់ចំណុចផ្ទះលេខ១៧១ ស្ថិតនៅភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ។

ជនសង្ស័យមានឈ្មោះ ទូច វ៉ារី ភេទប្រុស អាយុ៣២ឆ្នាំ មុខរបរគ្មាន មានទីលំនៅផ្ទះលេខ១៧១ ស្ថិតនៅភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ ត្រូវជាបងថ្លៃរបស់ជនរងគ្រោះឈ្មោះ ខែម ស្រីល័ក្ខ ភេទស្រី អាយុ៣០ឆ្នាំ មុខរបរកម្មការិនីរោងចក្រ មានទីលំនៅផ្ទះលេខ១៧១ ស្ថិតនៅភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ (ត្រូវជាប្អូនថ្លៃរបស់ជនសង្ស័យ) ។

ប្រភពបន្តថា កាលពីថ្ងៃទី២៤ ខែកញ្ញា ឆ្នាំ២០១៧ វេលា​ម៉ោង៤និង១៥នាទីល្ងាច ជនរងគ្រោះឈ្មោះ ខែម ស្រីល័ក្ខ ភេទស្រី អាយុ៣០ឆ្នាំ (ត្រូវជាប្អូនថ្លៃរបស់ជន សង្ស័យ) បានឲ្យ​ម៉ូតូ១គ្រឿង ម៉ាកHONDA CUBជ្រុង C50 ពណ៌ខៀវចាស់ ពាក់ស្លាកលេខ កំពង់ស្ពឺ 1C-1776 មានលេខតួ 9779450 លេខម៉ាស៊ីន9779487 ទៅជនសង្ស័យឈ្មោះ ទូច វ៉ារី ភេទប្រុស អាយុ៣២ឆ្នាំ (ត្រូវជាបងថ្លៃរបស់ ជនរងគ្រោះ) ដើម្បីជិះធ្វើការជាមួយបងស្រីម្នាក់ទៀតឈ្មោះ ទូច វ៉ាន់ណារ៉ូ ភេទស្រី ស្ថិតនៅភូមិភ្នាត សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។

រហូតដល់ថ្ងៃទី២៩ ខែកញ្ញា ឆ្នាំ២០១៧ វេលាម៉ោង៩ព្រឹកជនសង្ស័យបាន ត្រឡប់មកផ្ទះលេខ១៣១ ស្ថិតនៅភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ ដោយពុំមានជិះម៉ូតូម៉ាកខាងលើមកជាមួយទេ ។ ហើយជនរងគ្រោះក៏បានសួររក​ ម៉ូតូម៉ាកខាងលើ រួចជនសង្ស័យបានឆ្លើយប្រាប់ថា រូបគេ (ជនសង្ស័យ) បានយកទៅ ដាក់បញ្ចាំនៅ ផ្សារឃ្លាំង​រំសេវ សង្កាត់ទឹកល្អក់ ខណ្ឌទួលគោក រាជធានីភ្នំពេញ បានលុយចំនួន១០០ដុល្លារអាមេរិក យកទៅស៊ីចាយ និងលេងហ្គេមបាញ់ត្រីអស់ ។ ហើយជនរងគ្រោះ និងឈ្មោះ ឡ សូឈីន ភេទស្រី អាយុ៣៥ឆ្នាំ (ត្រូវជាបងស្រីបង្កើត របស់ជនសង្ស័យ) ក៏បានឃាត់ខ្លួនជនសង្ស័យខាងលើ យកមកប្រគល់ឲ្យ​សមត្ថកិច្ច ប៉ុស្តិ៍នគរបាលរដ្ឋបាលដង្កោ ធ្វើការសាកសួរ រួចជនរងគ្រោះក៏បានមកដាក់​ពាក្យ បណ្តឹងលើឈ្មោះជនសង្ស័យ ដើម្បីឲ្យ​សមត្ថកិច្ចចាត់ការតាមផ្លូវច្បាប់៕