ភ្នំពេញៈ កាលពីវេលាម៉ោង ៨ និង៥៥ នាទីយប់ថ្ងៃទី១១ ខែធ្នូ ឆ្នាំ២០១៧ មានករណីគ្រោះថ្នាក់ចរាចរណ៍ ដោយយុវជនម្នាក់ បានជិះម៉ូតូធ្លាក់ស្ពានចូលប្រទ្បាយ បណ្តាលឲ្យឈ្លក់ទឹកស្លាប់យ៉ាងអាណោចអាធ័មនៅនឹងកន្លែង ស្ថិតផ្លូវ២១៧ ចំណុចស្ពានថ្មក្បែរ ភូមិព្រែកជ្រៃ សង្កាត់ស្ពានថ្ម ខណ្ឌដង្កោ រាជធានីភ្នំពេញ។
ជនរងគ្រោះឈ្មោះ សុខ ចាន់រស្មី ភេទប្រុស អាយុ២៦ឆ្នាំ មុខរបរនិសិត្សពេទ្យសត្វ មានស្រុកកំណើត នៅភូមិពៃ ឃុំត្នោត ស្រុកបាទី ខេត្តតាកែវ បានជិះម៉ូតូម៉ាកសង់ឌ្រីម ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ ភ្នំពេញ1CT-9079។
តាមសមត្ថកិច្ច បានឲ្យដឹងថា មុនពេលកើតហេតុ ជនរងគ្រោះ បានជិះតាមបណ្ដោយផ្លូវលេខ២១៧ ក្នុងទិសដៅពីត្បូងទៅជើង លុះមកដល់កន្លែង កើតហេតុ ប្រហែលងងឹតមើលមិនឃើញស្ពាន ក៏បានជិះម៉ូតូធ្លាក់ស្ពានចូលប្រឡាយលូ បោកនិងជើងស្ពានស្លាប់ក្នុងទឹក យ៉ាងអាណោចអាធ័ម។
ក្រោយកើតហេតុសមត្ថកិច្ចមូលដ្ឋាន បានចុះទៅដល់ និងបានជួយស្រង់ជនរងគ្រោះយកមកលើគោក ដើម្បីជួយសង្គ្រោះ តែជាអកុសលជនរងគ្រោះបានស្លាប់បាត់បង់ជីវិតទៅហើយ។
បច្ចុប្បន្នសាកសពជនរងគ្រោះ សមត្ថកិច្ចបានប្រគល់ជូនក្រុមគ្រួសារ យកទៅធ្វើបុណ្យតាមប្រពៃណីហើយ៕
មតិយោបល់