កណ្តាល: កម្លាំងនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តកណ្តាល បានសហការជាមួយនគរបាលស្រុកកោះធំ ដោយមានកិច្ចសម្របសម្រួលពីលោក ឯក ស៊ុនរស្មី ព្រះរាជអាជ្ញារងអមសាលាដំបូងខេត្តកណ្តាល បានចុះប្រតិបត្តិការបង្ក្រាបទំនិញចាប់ហួយ និងនំស្រូយក្លែងក្លាយ។
ប្រតិបត្តិការនេះ បានធ្វើឡើងនៅវេលាម៉ោង៥ និង៥៩នាទីល្ងាចថ្ងៃទី៧ ខែកញ្ញា ឆ្នាំ២០១៨ នៅចំណុចផ្លូវ២១A ភូមិព្រែកសំរោង សង្កាត់តាខ្មៅ ក្រុងតាខ្មៅ និងទីតាំងមួយទៀត ត្រង់ចំណុចភូមិខ្ពម ឃុំសំពៅពូន ស្រុកកោះធំ ។
តាមសមត្ថកិច្ច បានឲ្យដឹងថា នៅក្នុងការបង្ក្រាបនេះ បានឃាត់រថយន្ត២គ្រឿង ដែលបានផ្ទុកទំនិញចាប់ហួយពេញនៅចំណុចផ្លូវលេខ២១A ភូមិព្រែកសំរោង សង្កាត់តាខ្មៅ និងបន្តទៅឆែកឆេរឃ្លាំងលាក់ស្តុបទំនិញនៅចំណុចភូមិខ្ពប ឃុំសំពៅពូន ស្រុកកោះធំ រួមទាំងឃាត់បានរថយន្ត១គ្រឿងទៀត បិតឃ្លុបជិតផ្ទុកសុទ្ធតែទំនិញចាប់ហ៊ួយ និងនំស្រួយក្លែងក្លាយ ។
វត្ថុតាងដកហូតបាន រួមមាន៖ រថយន្តចំនួន៣គ្រឿង ទី១ម៉ាកហ៊ីយាន់ដាយ២គ្រឿង និងរថយន្តកូរ៉េ១គ្រឿង នំស្រួយម៉ាក RUAPUAN ផលិតនៅប្រទេសវៀតណាមចំនួន១៦៨កេស ស្មើនឹង២០១៦០កញ្ចប់តូច ដំណាប់ដូងម៉ាកមិញ ចូវ ផលិតនៅប្រទសវៀតណាម៤៨កេស ស្មើ២០០កញ្ចប់ ចាប់ហួយដូងម៉ាក SONGLONG ចំនួន៣កេស ស្មើ៤៨កំប៉ុង និងនំចម្រុះជាច្រើន។
ម្ចាស់ទំនិញខាងលើឈ្មោះ ស្រ៊ន ចន្ធី ភេទស្រី អាយុ៤៤ឆ្នាំ មានទីលំនៅភូមិខ្ពប ឃុំសំពោពូន ស្រុកកោះធំ មានស្រុកកំណើតនៅភូមិថ្នល់បែកសង្កាត់រការក្រៅ ក្រុងដូនកែវ ខេត្តតាកែវ ត្រូវបានសមត្ថកិច្ចឃាត់ខ្លួន ដើម្បីធ្វើការសួរនាំ និងកសាងសំណុំរឿងចាត់ការតាមនិតិវិធី៕
មតិយោបល់