កាលពីយប់ថ្ងៃទី៨ មករា យប់មិញ នៅលើបណ្ដាញហ្វេសប៑ុក មានការបង្ហោះនាំឲ្យមានការភ្ញាក់ផ្អើលយ៉ាងខ្លាំង ជុំវិញព័ត៍មានថានាយចឺមក្រឡាប់ឡានស្លាប់នៅព្រៃវែង។ ក្រុមអ្នកលេងហ្វេសប៑ុក មិនថាតារា និងមិនមែនតារា សុទ្ធតែបានចែកចាយនូវការបង្ហោះនោះ ខណ:ដែលព័ត៍មានឆោឡោ ក៍លេចចំពេល នាយចឺម កំប្លែងចប់នៅកោះពេជ្រ និងខលទូរស័ព្ទមិនចូល។

ព័ត៍មានគ្មានការពិតនោះ បានសរសេរបង្ហោះថា នាយចឺមត្រូវស្លាប់ភ្លាមៗ បន្ទាប់ពីលោកបានជួបគ្រោះថ្នាក់ក្រឡាប់រថយន្តក្នុងពេលធ្វើដំណើរទាំងយប់ទៅស្រុកកំចាយមារ ក្នុងខេត្តព្រៃវែង។ នាយក្រូចជាឪពុកមារដែលស្ថិតនៅក្បែរនាយចឺមក្នុងពេលឆោឡោនោះ បានអះអាងនាយចឺម ក្រោយពេលសម្ដែងចប់នៅកោះពេជ្រ គឺបានអង្គុយលេងជាមួយខ្លួនមិនបានធ្វើដំណើរទៅណានាំឲ្យមានគ្រោះថ្នាក់នោះទេ។ លោកថានាយចឺម ស្ថិតនៅជិតខ្លួន និងថាជារឿងគួរឲ្យឆ្ងល់ដែលបណ្ដាលឲ្យមាននូវព័ត៍មាននោះឡើង។

នាយចឺម បានអះអាងថាលោកមិនភ្ញាក់ផ្អើលទេ ដោយសារតែក្នុងពេលមុនក៍ធ្លាប់មានការផ្អើលថាលោកលង់ទឹកស្លាប់ ក្នុងពេលថតកុនហាក់ដូចជាមែនទែនដូចគ្នា។ លោកចាត់ទុកថា ព័ត៍មានក្រឡាប់រថយន្តដែលគេចែកចាយកាលពីអាធ្រាតុយប់មិញ ជាដំណឹងខ្មោចឲ្យព្រលឹង និងថានឹងជួយឲ្យលោកមានសិរី ដោយសារក្នុងពេល ផ្អើលថាលោកលង់ទឹកស្លាប់ក៍មានលាភចូល ពេលក្រោយដូចគ្នា។ លោកមិនដឹងថាអ្វីដែលនាំឲ្យមានការបង្ហោះនោះទេ ខណ:ដែលលោកគ្រាន់តែអះអាងថាមិនមានការភ័យខ្លាចដូចអ្វីដែលបានបង្ហោះ និងចាត់ទុកថាជារឿងកាត់គ្រោះសម្រាប់ឆ្នាំថ្មី៕