បើទោះបីជា​លោក សាន ផានិត​ បច្ចុប្បន្នមានកេរ្តិ៍ឈ្មោះ ស្ទុះឡើង​ដោយប្រសើរជាងមុនបន្តិចក្តី ប៉ុន្តែ​តារាចម្រៀងចាស់វស្សា​ រូបនេះ នៅតែលើកសរសើរដល់តារាចម្រៀង ខេមរៈ សិរីមន្ត អំឡុងពេល​លោក(សាន ផានិត) ធ្លាក់កូដ ឆ្ងាយពីសិល្បៈ។​

កេរ្តិ៍ឈ្មោះ​ ស្ទុះឡើងនេះ​ បន្ទាប់ពីលោក សាន ផានិត បានចេញបទស្នាដៃកូនខ្មែរពីរបទ ក្នុងនោះ មានបទ «គ្មានសិទ្ធិ» និង បទ«ផ្កាយព្រះអង្គារ​» បំពេរ​អារម្មណ៍ទស្សនិកជនកន្លងមក។​

ងាកទៅកាន់ប៉ុន្មានឆ្នាំមុនអំឡុងពេលធ្លាក់កូដ ឆ្ងាយពីសិល្បៈ លោក សាន ផានិត បានរំឭកពីទង្វើល្អរបស់តារាចម្រៀង ខេមរៈ សិរីមន្ត ដោយនៅតែរាប់អានលោក ដោយគ្មានទើសទាល់​។​

លោក សាន ផានិតថា អំឡុងពេលដែលលោកធ្លាក់កូដខ្លាំង ប៉ុន្តែលោក សិរីមន្ត​ នៅតែ​រាប់អានលោក ក្នុងនាម​ជា​រៀមច្បង​ក្នុងពិភពសិល្បៈ ហៅទៅញ៉ាំ​អាហាររួមគ្នា មិនរើសអើង ហើយ​អ្វីដែលកាន់តែពិសេសនោះគឺ រាល់ពេលដែល តារាចម្រៀង សិរីមន្ត ជួបលោកតែងតែលើកដៃសំពះ ក្នុងទឹកមុខ​បង្កប់ដោយស្នាមញញឹម ។​
ម្ចាស់បទ «ទូរស័ព្ទប្រាប់ផង​» បានបន្តថា ក្រៅពីសិរីមន្ត អំឡុងពេលធ្លាក់កូដ មានអ្នកសិល្បៈ​មួយចំនួន ពេលឃើញលោក សូម្បីតែលើកដៃសំពះ ឬ ញញឹមក៏គ្មានដែរ ដែលបញ្ជាក់នូវ​ចំណុចរើសអើង អ្នកសិល្បៈដូចគ្នា ។​

បើទោះបីជាយ៉ាងនេះក្តី លោក សាន ផានិត បាន​អះអាងថា សម្រាប់ទង្វើមិនល្អរបស់អ្នកសិល្បៈមួយចំនួន ធ្វើបែបនោះ លោកមិនប្រកាន់ខឹងនោះទេ វា​ជារឿងបុគ្គល តែលោកក៏មិនបង្ខំអោយនរណា​គោរពដែរ។​

ប៉ុន្តែ​អ្វីដែលអស្ចារ្យនោះ អំឡុងពេលថ្មីៗនេះ តារាចម្រៀង ខាន់ ជេមស៍ បានហៅលោក សាន ផានិត​ ពេញៗមាត់ថា ជាលោកគ្រូ និង​ជា​ Idol អំឡុងពេលប្រគំតន្ត្រីស្រាបៀរនៅបន្ទាយមានជ័យ។​ដោយឡែក​សម្រាប់ ឆាយ វិរៈយុទ្ធ វិញ ក៏មិនខុសគ្នា​ពី ខាន់ ជេមស៍ ដែរ ដោយ​សម្តែង​នូវ​អាកប្បកិរិយា រួសរាយ រាក់ទាក់​ពេលជួបលោក និងលើកដៃសំពះ ដូចគ្នា ដោយអស់ពីដួងចិត្តតែម្តង​៕​