ក្រោយពីសាច់រឿងក្នុងបទចម្រៀង “មេឃកំពុងភ្លៀងហើយ” ត្រូវបានចេញផ្សាយនៅលើYoutube បានធ្វើឲ្យបទចម្រៀងមួយនេះកាន់តែផ្ទុះខ្លាំងឡើងពីស្រទាប់យុវវ័យ។ តារាប្រុសស្រី២រូប ដែលបានប្រឡូកសិល្បៈច្រើនឆ្នាំកន្លងមកមិនសូវមានគេស្គាល់ ក៏បានអណ្ដែតឡើងដោយសារចម្រៀងមួយបទនេះផងដែរ។

តារាសម្ដែងប្រុសដែលមានឈ្មោះថា ពេជ្រ សម្បត្តិរស្មី ហៅលោកតាក់ បានក្លាយជាតារាវ័យក្មេងមួយរូប ទទួលបានការសរសើរដោយសារតែមានឱកាសសម្ដែងបទនេះ។ លោកជាបងប្រុសរបស់តារាសម្ដែងនាង ពេជ្រ សុវណ្ណភិជ្ជរ៉ា ដែលមានស្នាដៃរាប់មិនអស់ជាច្រើនមកហើយ ប៉ុន្តែបើធៀបនឹងការសម្ដែងមួយបទនេះគឺលេចធ្លោជាង។ លោកត្រូវបានលោក Rith Omega ដែលជាអ្នកដឹកនាំសម្ដែងបទនេះ ជ្រើសឲ្យធ្វើជាតួឯកប្រុស ដោយអះអាងថាមានអត្តចរឹតខាងក្រៅ និងត្រេមុខត្រូវតាមសាច់រឿងដែលបានតាក់តែង។

មិនខុសគ្នាដែរ តួឯកស្រីនៅក្នុងបទនេះ កញ្ញា សិទ្ធី នីកា ក៏រឹតតែលេចធ្លោទៅទៀត ដោយនាងបានអះអាងដោយផ្ទាល់មាត់ គ្រាន់តែFull សាច់រឿងបទ “មេឃកំពុងភ្លៀងហើយ” ចេញបង្ហោះជាសាធារណៈភ្លាម ក៏មានអ្នកស្គាល់នាងច្រើនតែម្ដង ក្នុងពេលដែលនាងប្រឡូកសិល្បៈច្រើនឆ្នាំមកហើយ តែប្រជាប្រិយភាពនៅមានកម្រិត។ នាងថាសម្ដែងមួយបទពិបាក ជាពិសេសត្រូវថតហាលភ្លៀងទម្រាំថតត្រូវ ប៉ុន្តែបើមើលពីសន្ទុះដែលនាងទទួលបានគឺមិនធម្មតា។ នាងថាមួយបទនេះ លោក Rith Omega ដឹកនាំសម្ដែងដោយការហ្មត់ចត់បំផុត ទើបអាចធ្វើឲ្យបទចម្រៀងមួយនេះកាន់តែល្បីសុះសាយ ក្រោយចេញMV ផ្លូវការ។ មកទល់ពេលនេះបទ “មេឃកំពុងភ្លៀងហើយ” កាន់តែបុកត្រូវអារម្មណ៍មហាជន ជាពិសេសសាច់រឿងដែលបានសម្ដែងដោយលោកតាក់ និងកញ្ញា សិទ្ធី នីកា ដែលត្រូវគេអះអាងសម្ដែងជាគូស្នេហ៍គ្នាស័ក្តសមនោះ។

លោក Rith Omega បានអះអាងថាក្រោយពីទទួលជោគជ័យ ក្នុងការដឹកនាំមួយបទនេះ លោកនឹងមានសាច់រឿងសម្រាប់បទក្រោយល្អមើលជាងនេះទៀត ដើម្បីឲ្យបទចម្រៀងរបស់តារាដែលលោកបានទទួលការងារមានភាពលេចធ្លោ។ ក្នុងនោះលោកក៏មានគម្រោងយកលោកតាក់ និង សិទ្ធី នីកា ឲ្យសម្ដែងSweet sweet បែបហ្នឹងសម្រាប់ការដឹកនាំបទចម្រៀងក្រោយៗផងដែរ៕