បន្ទាប់ពីបានបញ្ចប់ព្រឹត្តិការណ៍មហោស្រពភាពយន្តនៅក្នុងទីក្រុងហុងកុងកាលពីថ្ងៃទី២០ មីនា ក្រុមផលិតករ២ក្រុមបានមកដល់ប្រទេសកម្ពុជាវិញហើយនៅល្ងាចថ្ងៃ២១ មីនា ដោយផលិតករទាំងពីរបានបង្ហាញពីលទ្ធផលជាច្រើនដែលបានទទួលពីព្រឹត្តការណ៍អន្តរជាតិមួយនេះផង។ យ៉ាងណាមិញ លទ្ធផលចុងក្រោយ គឺភាពយន្តរបស់កម្ពុជានៅតែពិបាកប្រជែងនឹងទីផ្សារភាពយន្តនៅក្រៅប្រទេសដោយសារតែបញ្ហាជាច្រើនដែលផលិតករទាំងបង្ហើបថាគឺជារឿងពិបាកប្រសិនបើផលិតករខ្មែរចង់បានរឿងមួយអោយចូលទីផ្សារក្នុងមហោស្រពនេះបាន។

លោក អ៉ិន សុភិន ចាងហ្វាងផលិតកម្មមហាហង្ស និយាយថាក្រោយពីបានចូលរួមក្នុងព្រឹត្តិការណ៍ Hong Film Mart Festival ដែលបានធ្វើឡើងនៅក្នុងប្រទេសចិន បានធ្វើអោយលោកយល់ដឹងកាន់តែច្រើនជាមួយនឹងទម្រង់ក្នុងការផលិតភាពយន្ត ដោយលោកបញ្ជាក់ថាក្រៅពីដឹងថាត្រូវធ្វើដូចម្ដេចដើម្បីអោយភាពយន្តអាចឈរជើងបាន ក៏បាននឹងយល់ច្រើនខុសពីមុនផងដែរ ពីការផលិតភាពយន្តដើម្បីអោយបានល្អ។

លោកថានៅក្នុងព្រឹត្តិការណ៍មហោស្រពនេះ លោកមើលឃើញជាងគេពីហេតុផលដែលភាពយន្តបរទេសមានការរីកចម្រើន ហើយលោកក៏មើលឃើញកាន់តែច្បាស់ពីញ្ហាពីបញ្ហាបច្ចេកទេសក្នុងការផលិតរឿង។ លោកថាភាពយន្តខ្មែរទោះជាខំពង្រឹងស្នាដៃកម្រិតណា ក៏មិនងាយហក់ចូលទីផ្សារអន្តរជាតិអោយត្រូវបានដែរ ដោយសារតែផលិតករខ្មែរកម្រមានដើមទុនដល់កន្លះលាន ទៅ១លានដើម្បីផលិតភាពយន្ត។

មិនខុសគ្នាដែរ អ្នកស្រី សរ កេសារ៉ា ម្ចាស់ផលិតកម្មសរកេសារ៉ាភាពយន្ត ដែលបានចូលរួមក្នុងព្រឹត្តិការណ៍មហោស្រពនេះជាលើកទី១បានអះអាងថា អ្នកស្រីបានជជែកពិភាក្សាជាមួយផលិតករបរទេសជាច្រើនលើការផលិតភាពយន្ត ហើយជាលទ្ធផលអ្នកស្រីទទួលបានចំណេះដឹងច្រើនឡើង ជាពិសេសលើការបង្កើតប្លង់ក្នុងផ្ទៃរឿង និងការរំលេចផ្ទៃរឿងអោយមានគុណភាពជាដើម។ អ្នកស្រីទទួលស្គាល់ថាក្រោយការពិក្សា ភាពយន្តកម្ពុជាមានកង្វះខាតច្រើនណាស់ ពោលគឺទាំងផ្ទៃរឿង ទាំងប្លង់ ទាំងសំឡេង និងជាពិសេសគឺគុណភាពតែម្ដង ទើបអ្នកស្រីយល់ថាបន្ទាប់ពីបានត្រឡប់មកពីមហោស្រពភាពយន្ត ជំហ៊ានដំបូងដែលអ្នកស្រីត្រូវធ្វើ គឺត្រូវសិក្សាបច្ចេកទេសអោយបានកាន់តែច្រើនថែមទៀត ដើម្បីធ្វើអោយភាពយន្តដែលអ្នកស្រីគ្រោងផលិតក្នុងពេលបន្តបន្ទាប់ អាចទទួលយកបាន។

អ្នកស្រីបញ្ជាក់ថាផលិតករដែលមិនបានទៅឃើញ និងស្វែងយល់ពីការផលិតភាពយន្តក្នុងពេលខាងមុខ។ យ៉ាងណាមិញ អ្នកស្រីបង្ហើបថាកត្តាដែលផលិតកម្មរបស់ខ្លួនមិនអាចផលិតបានភាពយន្តមួយអោយត្រូវកម្រិតនៅឡើយ គឺបញ្ហាដើមទុនមិនដល់គេ និងការប្រើប្រាស់បច្ចេកទេសសម្ភារៈមិនទំនើបដល់ក្រុមផលិតករបរទេសតែម្ដង តែអ្នកស្រីនឹងយកបទពិសោធន៍ដែលខ្លួនទើបទទួលបានយកមកអភិវឌ្ឍន៍ស្នាដៃអោយអស់ពីលទ្ធភាព៕