ភ្នំពេញ: ខុសពីនៅក្នុងស្រុកដែលទាល់តែយូរៗម្ដង ទើបអ្នកនាងខៀវ សានសាណា បានបង្ហោះរូបឲ្យឃើញពីសកម្មភាពរបស់ខ្លួន ស្រាប់តែនាងគ្រាន់តែដល់អូស្ត្រាលីមិនទាន់បានប៉ុន្មានម៉ោងផង ក៏បង្ហោះឲ្យឃើញរូបភ្លែតឲ្យគេបានដឹងពីគ្រប់សកម្មភាព។ ទិដ្ឋភាពដើរកម្សាន្ត និងភាព ផ្អែមល្ហែមជាមួយស្វាមីត្រូវបានបង្ហោះឡើងគ្មានសល់ចន្លោះ ដែលផ្ទុយពីការយល់ថានាងមិនចូលបង្អួតសកម្មភាពឯកជន និងមិនចូលចិត្តប្រើប្រាស់ប្រព័ន្ធហ្វេសប៊ុកនោះ។

ក្នុងប៉ុន្មានថ្ងៃនេះ ខៀវ សានសាណា រមែងបង្ហោះរូបភាពផ្សេងៗអមសំណេរសប្បាយចិត្ត ដែលបង្ហាញជាសារថានាង បានរួចពីសម្ពាធមមាញឹក ហើយមានដើរកម្សាន្តពេញលេញ។ បើទោះជាការដើរកម្សាន្តនាពេលកន្លងមកត្រូវគេឃើញយូរៗម្ដងកើតឡើងក្នុងស្រុក ប៉ុន្តែគ្មានអ្នកណាមិនដឹងនោះទេ ថាដំណើរទាំងនោះគឺសប្បាយដូចភ្នែកនៅនឹងកញ្ចឹងក ព្រោះតែការងារដែលនាងបានទទួលក៏ច្រើនពិបាកដកឃ្លាមិនយកមកគិត។

យ៉ាងណាមិញ បើឡេកមើលទិដ្ឋភាពក្នុងពេលដែលនាងទៅដល់អូស្រ្តាលីនេះវិញ គឺមានសេរីភាពពេញទីតែម្ដង ដោយសារតែនាងបានសម្រេចចិត្តទម្លាក់ចោលនូវរាល់ការងារ ហើយប្រើសេចក្ដីចិត្តយ៉ាងកម្រជាមួយស្វាមី។ ក្រៅពីបង្ហោះរូបភាពច្រើនវគ្គច្រើនសារពីដំណើរកម្សាន្តរបស់ខ្លួននៅអូស្រ្តាលី នាងក៏បានបង្ហោះរូបថតរៀបការជាច្រើនខ្សែបន្តកន្ទុយគ្នាដូចក្លែងនៅលើផេក និងលើគណនីផ្ទាល់ខ្លួនឲ្យអ្នកគាំទ្របានឃើញ បានLike និង Comment យ៉ាងខុសប្លែកពីពេលកន្លងផងដែរ ដើម្បីបង្ហាញថានាងមិនមែនជាតារាមិនចូលចិត្តហ្វេសប៊ុក និងមិនចូលចិត្តបង្ហោះបង្អួតពីសកម្មភាពរបស់ខ្លួននោះទេ តែមកពីគ្មានពេលវេលាទើបសូម្បីតែការឆ្លើយតបសាររបស់អ្នកគាំទ្រក៏មិនមាន។

ខៀវ សានសាណាបានអះអាងថា នាងកម្រមានពេលដើរកម្សាន្តដោយមិនគិតពីការងារណាស់ ហើយក៏ចាត់ទុកថានេះជារឿងដ៏កម្រផងដែរ ដែលនាងអត់ខ្វល់ពីកិច្ចការងារហើយមានពេលបង្អួតភាពស្រស់ស្រាយរបស់ខ្លួនដោយមានសេរីភាព។ នាងថាក្រោយបញ្ចប់ដំណើរកម្សាន្តរយ:ពេលមួយខែនៅស្រុកស្វាមី នោះនាងមិនមានឱកាសបែបនោះទៀតទេ ដោយសារតែភាពជាក់ស្ដែងគឺមានការងារយប់ថ្ងៃៗ ស្ទើរនឹងមិនមានពេលវេលាឲ្យនាងសម្រាក កុំថាដល់មានពេលឆ្លើយឆ្លងក្នុងហ្វេសប៊ុកទៅអ្នកគាំទ្រ។ យ៉ាងណាមិញ នាងថាខ្លួនចូលចិត្តការដាក់សម្ពាធជាមួយការងារបែបនេះ ទើបនាងមិនដែលព្រលែងចោលនូវការងារណាមួយដែលទាក់ទងមក៕