ព័ត៌មានជាតិ

ផ្ញើរម៉ូតូតម្លៃ៣ពាន់រៀលគ្រាន់តែបាត់សំបុត្រទារ១០ដុល្លារ ម្ចាស់អត់លុយឲ្យទារទាំងកាតគ្រីយកទៅទុកទៀត នៅក្បែរណាហ្គាវើល!

ភ្នំពេញ: ទីតាំងផ្ញើរម៉ូតូមួយកន្លែង ដែលមានទីតាំងនៅក្បែរណាហ្គាវើល បានបង្កឲ្យមានការភ្ញាក់ផ្អើលយ៉ាងខ្លាំង ដោយសារតែមានបុរសវ័យចំណាស់ម្នាក់ បានកាន់កាតគ្រី និងអត្តសញ្ញានប័ណ្ណរបស់គាត់មួយសន្លឹក រត់ទៅប្តឹងនគរបាលប៉ុស្តិ៍ទន្លេបាសាក់ឲ្យជួយធ្វើអន្តរាគមន៍កាលពីពីវេលម៉ោង១និង២៥នាទី រសៀលថ្ងៃទី ៣០ ខែឧសភា ឆ្នាំ២០១៧ នៅពេលដែលកូនប្រុសរបស់គាត់បានយកម៉ូតូមួយគ្រឿងទៅផ្ញើរក្នុងតម្លៃរហូតដល់ទៅ ៣ពាន់រៀល ហើយបាត់សំបុត្រ ម្ចាស់ទីតាំងទារលុយចំនួន ១០ដុល្លារ អត់លុយឲ្យហើយទារកាតគ្រីយកទៅទុកថែមទៀតនោះ។

តាមប្រភពពីបុរសម្នាក់ឈ្មោះ ជុំ កន អាយុ៥២ឆ្នាំ បានប្រាប់ឲ្យដឹងថា មុនពេលកើតហេតុ កូនប្រុសរបស់លោកម្នាក់ឈ្មោះ កៅ រិទ្ធ អាយុ ៣១ឆ្នាំ មុខរបរជាងដែក បានយកម៉ូតូម៉ាក ហុងដាសេ១២៥ ពណ៌ខ្មៅ ពាក់ស្លាកលេខ តាកែវ 1J-9919 មួយគ្រឿងយកទៅផ្ញើរកន្លែងផ្ញើរម៉ូតូមួយកន្លែង ដែលមានទីតាំងនៅក្បែរណាហ្គាវើល ដោយក្នុងតម្លៃ ៣០០០រៀល ហើយក៏ឡើងទៅធ្វើការនៅលើណាហ្គាបាត់ទៅ។ លុះដល់ម៉ោងជាង១១ ចប់ការងារក៏ចុះមកកន្លែងផ្ញើរម៉ូតូវិញរកមើលសំបុត្រនៅក្នុងហោប៉ៅមិនឃើញ ក៏ត្រូវស្ត្រីម្នាក់ម្ចាស់ទីតាំងខាងលើទារលុយចំនួន ១០ ដុល្លារ បន្ថែមទៀត អត់មានលុយឲ្យម្ចាស់ទីតាំងក៏ទារយកកាតគ្រីបន្ថែមទៀត ហើយក៏រត់មកប្តឹងនគរបាលប៉ុស្តិ៍ទន្លេបាសាក់ឲ្យជួយធ្វើអន្តរាគមន៍តែម្តង។

ក្រោយពីបុរសជាឪពុកមករកអន្តរាគមន៍រួចហើយ កម្លាំងនគរបាលនគរបាលប៉ុស្តិ៍ទន្លេបាសាក់ក៏ចុះទៅកន្លែងផ្ញើរម៉ូតូខាងលើជួយដោះនិយាយស្រាយ ដោយយល់ព្រមឲ្យលុយទៅស្ត្រីជាម្ចាស់ទីតាំងខាងលើចំនួន១ម៉ឺនរៀលបន្ថែមទៀត ទើបព្រមប្រគល់ម៉ូតូទៅឲ្យម្ចាស់គេវិញ៕

មតិយោបល់