កំពង់ឆ្នាំងៈ ហេតុការណ៍គ្រោះថ្នាក់ចរាចរណ៍ដ៏រន្ធត់មួយបានកើតឡើង បង្កឡើងដោយរថយន្តដឹកដីបើកវ៉ារថយន្តដឹកដីដូចគ្នា ទៅបុកក្មេងស្រីម្នាក់របួសធ្ងន់ ក្រឡាប់កិនបុរសម្នាក់ស្លាប់។

ហេតុការណ៍កើតឡើងនៅវេលាម៉ោង១១និង៣០នាទី ថ្ងៃត្រង់ ទី៥ ខែមិថុនា ឆ្នាំ២០១៧ នៅលើផ្លូវគ្រួសក្រហម ចំណុចមុខផ្ទះ ភី ស្ថិតក្នុងភូមិទ័ពបោះ ឃុំធ្លកវៀន ស្រុកសាមគ្គីមានជ័យ ខេត្តកំពង់ឆ្នាំង។

សមត្ថកិច្ចបានឲ្យដឹងថា បុរសដែលស្លាប់ឈ្មោះ ឃីម ណាត អាយុ៤៧ឆ្នាំ ស្នាក់នៅភូមិឃុំកើតហេតុខាងលើ។ ចំណែកក្មេងស្រីឈ្មោះ វៀន ម៉ាឡែន អាយុ៧ឆ្នាំ ស្នាក់នៅភូមិឃុំកើតហេតុខាងលើ។

ប្រភពដដែលបន្តថា មុនពេលកើតហេតុគេ គេឃើញរថយន្តបង្ក បើកបរក្នុងល្បឿនលឿន លុះមកដល់ចំណុចកើតហេតុ បានបុកកៀរដែលកំពុងដើរឆ្លងផ្លូវ បណ្តាលឲ្យរងរបួសធ្ងន់ ហើយក្រឡាប់កិនលើបុរសម្នាក់ដែលកំពុងជិះកង់ បណ្តាលឲ្យស្លាប់ភ្លាមៗនៅកន្លែងកើតហេតុ។
ក្រោយពីកើតហេតុអ្នកបើករថយន្តរត់គេចខ្លួនបាត់។ ចំណែកក្មេងស្រីរងគ្រោះ ត្រូវបានក្រុមគ្រួសារដឹកយកទៅសង្គ្រោះបន្ទាន់នៅមន្ទីរពេទ្យអង្អែកស្រុក និងសាកសពជនរងគ្រោះ សមត្ថកិច្ចប្រគល់ឲ្យក្រុមគ្រួសារយកទៅធ្វើតាមប្រពៃណី។

បច្ចុប្បន្នសមត្ថកិច្ចនគរបាលស្រុកសាមគ្គីមានជ័យកំពុងតាមស្រាវជ្រាវរកអ្នកបើកបររថយន្តដឹកដី យកមកផ្ដន្ទាទោសតាមផ្លូវច្បាប់៕