ភ្នំពេញ: ហេតុការណ៍ដ៏គួរឲ្យរន្ធត់មួយបានកើតឡើងដោយរថយន្តធន់ធំបុកបន្តកន្ទុយគ្នាចំនួន៣គ្រឿង បណ្តាលឲ្យរងការខូចខាតយ៉ាងដំណំ។

ហេតុការណ៍ខាងលើនេះបានបង្កឲ្យមានការភ្ញាក់ផ្អើលកាលពីវេលាម៉ោង១១ព្រឹក ថ្ងៃទី៦ ខែតុលា ឆ្នាំ២០១៧ ស្ថិតនៅតាមបណ្តោយផ្លូវជាតិលេខ៤ ទល់មុខនិងខ្លោងទ្វារវត្តកំបូលតែម្តង ស្ថិតក្នុងសង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានបញ្ជាក់ឲ្យដឹងថា មុនពេលកើតហេតុរថយន្តទាំង៣គ្រឿងខាងលើធ្វើដំណើរក្នុងទិសដៅពីកើតទៅលិចដូចគ្នា ដោយរថយន្តបើកខាងមុខគេគឺជារថយន្តកុងតឺន័រធន់ធំ ពាក់ស្លាកលេខ តាកែវ 3A-1898 ដែលបើកបរដោយបុរសម្នាក់មិនស្គាល់អត្តសញ្ញាណកំពុងធ្វើដំណើរពីកើតទៅលិច រួចមកដល់ចំណុចកើតហេតុក៏បានវ៉ាក់អឺរជាមួយរថយន្តមួយទៀតដែលនៅពីខាងមុខក៏បានជាន់ហ្រ្វាំងទុចជាប់ ហើយនៅពេលជាមួយគ្នានោះផងដែរ ក៏មានរថយន្តក្រុងដឹកអ្នកដំណើររបស់ក្រុមហ៊ុន ភ្នំពេញ សូរិយា ដឹកអ្នកដំណើរ១៦៨ មួយគ្រឿង ពាក់ស្លាកលេខ ភ្នំពេញ 3B 4098 មកពីក្រោយវ៉ាក់អឺរជាន់ហ្រ្វាំងអត់ជាប់ដូចគ្នាក៏បានជ្រុលទៅគូថរថយន្តកុងតឺន័រពេញទំហឹង បណ្តាលឲ្យរថយន្តរបស់ខ្លួនរងការខូចខាតកញ្ចក់ផ្នែកខាងមុខបែកប្រេះទាំងស្រុងតែម្តង ហើយនៅក្នុងពេលតែមួយនោះដូចគ្នាក៏មានរថយន្តសាំយ៉ុង ពណ៌លឿង ដឹកអ្នកដំណើរមួយគ្រឿងទៀតពាក់ស្លាកលេខ ភ្នំពេញ 2AQ 4602 បានមកបុកគូថរថយន្តក្រុងពេញទំហឹងដូចគ្នា បណ្តាលឲ្យរងការខូចខាតផ្នែកខាងមុខយ៉ាងដំណំដូចគ្នា។

ក្រោយពេលកើតហេតុភាគីដែលជាម្ចាស់រថយន្តទាំង៣ពុំបានស្នើសុំឲ្យសមត្ថកិច្ចប្រចាំមូលដ្ឋានជួយដោះស្រាយឡើយដោយភាគីទាំង៣សុំដោះស្រាយដោយខ្លួនឯងដើម្បីបញ្ចប់រឿងដោយខ្លួនឯងតែម្តង៕

//youtu.be/9P8IIJtR-_8