ភ្នំពេញៈ រថយន្តស៊េរីទំនើបម៉ាកឡិចស៊ីស៤៧០មួយគ្រឿង បានបើកបរដោយខ្វះការប្រុងប្រយ័ត្នក៏បានជ្រុលទៅបុកម៉ូតូម៉ាកវ៉េវ មួយគ្រឿង ជាប់នៅក្រោមឡានត្រង់ចំណុចផ្លូបបែកជា៤ បណ្តាលឲ្យបុរសម្នាក់រងរបួសយ៉ាងធ្ងន់ធ្ងរសំណាងល្អមិនបណ្តាលឲ្យគ្រោះថ្នាក់ដល់អាយុជីវិត។

ករណីគ្រោះថ្នាក់ចរាចរណ៍នេះដែរ បានកើតឡើងកាលពីវេលាម៉ោង ១១និង ១៥នាទីព្រឹក ថ្ងៃទី២៧ ខែវិច្ឆិកា ឆ្នាំ២០១៧ នៅត្រង់ចំណុចផ្លូវលេខ ៤៣២ កែងនិងផ្លូវ១២៣ ក្នុងសង្កាត់បឹងត្របែក ខណ្ឌចំការមន រាជធានីភ្នំពេញ។

មុនពេលកើតហេតុ គេបានឃើញម៉ូតូម៉ាកវ៉េវ ពណ៌ក្រហមលាយខ្មៅ ពាក់ស្លាកលេខ ភ្នំពេញ 1CC-7719 បើកបរដោយបុរសវ័យចំណាស់ម្នាក់ ក្នុងទិសដៅពីកើតទៅលិច លុះដល់ចំណុចកើតហេតុខាងលើ ក៏ស្រាប់តែមានរថយន្តម៉ាកឡិចស៊ីស ៤៧០ ពណ៌ទឹកមាស ពាក់ស្លាកលេខ ភ្នំពេញ 2F-5454 បើកបរដោយបុរសម្នាក់ឈ្មោះ លន់ អ៉ីន អាយុ៥២ឆ្នាំ ក្នុងទិសដៅពីត្បូងទៅជើង បុកខ្ទាតជនរងគ្រោះបណ្តាលឲ្យរបួសធ្ងន់ និងកិនម៉ូតូជាប់ខាងក្រោមរថយន្តជាប់តែម្តង។

ក្រោយពេលកើតហេតុ បុរសជនរងគ្រោះត្រូវបានក្រុមគ្រួសារបញ្ជូនយកទៅធ្វើការសង្គ្រោះនៅមន្ទីរពេទ្យ ចំណែកឯរថយន្តម៉ាកឡិចស៊ីសបង្ក និង ម៉ូតូរបស់ជនរងគ្រោះត្រូវបានបញ្ជូនយកទៅកាន់អធិការដ្ឋាននគរបាលខណ្ឌចំការមនក្រោយពីធ្វើការវាស់វែងរួច ដើម្បីរង់ចាំធ្វើការដោះស្រាយគ្នាជាបន្តទៅទៀត។