រតនគិរីៈ ករណីគ្រោះថ្នាក់ចរាចរណ៍ដ៏រន្ធត់មួយ បានកើតឡើង រវាងរថយន្តកាម៉ារី បើកបុកគោយន្តកន្រ្តៃ បណ្តាលឲ្យស្លាប់ម្នាក់ របួសធ្ងន់៥នាក់ និងរបួសស្រាលចំនួន៧នាក់ ក្នុងនោះមានស្រីចំនួន៧ នាក់។

ហេតុការណ៍នេះ បានកើតឡើង កាលពីវេលាម៉ោង៧និង៣០នាទីយប់ ថ្ងៃទី២៧ ខែវិច្ឆិកា ឆ្នាំ២០១៧ នៅត្រង់ចំណុចផ្លូវចូលវត្តលំផាត់ នៅលើផ្លូវជាតិលេខ៧៦ ចន្លោះបង្គោលគីឡូម៉ែត្រ២៧៣និង២៧៤ ស្ថិតនៅភូមិលំផាត់ ឃុំជ័យឧត្តម ស្រុកលំផាត់ ខេត្តរនគិរី។

ជនបង្កមានឈ្មោះ ចាន់ រស្មី ភេទប្រុស អាយុប្រហែល៣០ជាង ជនជាតិខ្មែរ ស្នាក់នៅស្រុកកោះញែក បើករថយន្តមួយគ្រឿង ម៉ាកកាម៉ារីបាឡែន ពណ៌កណ្តុរប្រម៉េះ ពាក់ស្លាកលេខភ្នំពេញ 2S-3178 បានរត់គេចខ្លួនបាត់។

ក្រោយពេលកើតហេតុ សមត្ថកិច្ចបានចុះទៅដល់កន្លែងកើតហេតុ ដើម្បីធ្វើការវាស់វែង និងបញ្ជូនជនរងគ្រោះទៅសង្រ្គោះបន្ទាន់ នៅមន្ទីរពេទ្យបង្អែកខេត្ត ចំណែកសាកសពប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី រីឯវត្ថុតាងទាំងពីរគ្រឿង ត្រូវបានយកមករក្សាទុកបណ្តោះអាសន្ន នៅអធិការដ្ឋាននគរបាលស្រុកលំផាត់ ដើម្បីបន្តនិតិវិធីស្រាវជ្រាវរកជនបង្ក មកដោះស្រាយតាមផ្លូវច្បាប់៕