ភ្នំពេញៈ បុរស២នាក់ស្រវឹងធ្លាក់ភ្នែក ជិះម៉ូតូមួយគ្រឿងក្នុងល្បឿនលឿនមិនប្រយ័ត្ន ក៏ជ្រុលទៅបុកពីក្រោយម៉ូតូមួយគ្រឿងទៀតពេញទំហឹង កាលពីវេលាម៉ោង១១និង៥០នាទីយប់ ថ្ងៃទី០១ ខែវិច្ឆិកា ឆ្នាំ២០១៨ ត្រង់ចំណុច ក្បែរមន្ទីរពេទ្យព្រះកុសុមៈ តាមបណ្ដោយផ្លូវ២៧១កែងនិងផ្លូវ១៨២ ស្ថិតក្នុងសង្កាត់ទឹកល្អក់ទី៣ ខណ្ឌទួលគោក។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញនារីម្នាក់បើកបរម៉ូតូមួយគ្រឿងម៉ាក ធូដេ ពណ៌ឈាមជ្រូក ពាក់ស្លាកលេខ ភ្នំពេញ1DM-2504 ដោយធ្វើដំណើរតាមបណ្តោយផ្លូវ២៧១ ក្នុងទិសដៅបើកមកពីស្តុបណូគាបំណងឆ្ពោះទៅស្ពានអាកាស៧មករា។ លុះមកដល់ចំណុចកើតហេតុ ក៏ស្រាប់តែមានម៉ូតូមួយគ្រឿងទៀតម៉ាក ហុងដាឌ្រីម ស៊េរី០១៧ ពណ៌ខ្មៅ ពាក់ស្លាកលេខ ភ្នំពេញ1GM-4620 ដែលបើកបរដោយបុរសពីរនាក់ក្នុងស្ថានភាពស្រវឹងជោកជាំ និងក្នុងល្បឿនលឿនមិនប្រយ័ត្ន ក៏ជ្រុលទៅបុកគូទម៉ូតូធូដេខាងលើចំពីក្រោយពេញទំហឹងបណ្ដាលឲ្យម៉ូតូទាំង២គ្រឿងដួលរងការខូចខាតបន្តិចបន្តួចទាំងសងខាង។ ចំណែកឯនារីរងគ្រោះជាអ្នកបើកបរម៉ូតូធូដេរងរបួសរលាត់ដៃរលាត់ជើងនិង ចុកចុងដង្ហើម ហើយក៏ត្រូវបានសាច់ញាតិដឹងតាមម៉ូតូកង់បីទៅសង្គ្រោះភ្លាមៗផងដែរ។
ក្រោយពេលកើតហេតុសមត្ថកិច្ចមូលដ្ឋាននិងសមត្ថកិច្ចក៏បានចុះមកធ្វើការវាស់វែងនិងយកម៉ូតូទាំង២រគ្រឿងទៅរក្សាទុកនៅអធិការដ្ឋាននគរបាលខណ្ឌទួលគោកដើម្បីរង់ចាំធ្វើការដោះស្រាយគ្នាទៅតាមផ្លូវច្បាប់នៅពេលក្រោយ៕
មតិយោបល់