ភ្នំពេញ: បុរស២នាក់ ម្នាក់បានស្លាប់ពេលដឹកបញ្ជូនដល់មន្ទីរពេទ្យ ម្នាក់រងរបួសបាក់ជើង បន្ទាប់ពីជួបគ្រោះថ្នាក់ចរាចរណ៍ គ្រាដែលកំពុងអង្គុយជួសជុល ប្តូរកង់រថយន្តលើចិញ្ចើមផ្លូវ ស្រាប់តែមានរថយន្តមួយគ្រឿងផ្សេងទៀតបើកមកបុកពីក្រោយ កាលវេលម៉ោង៥និង៥០នាទីព្រលប់ ថ្ងៃទី២៨ ខែធ្នូ ឆ្នាំ២០១៨ ស្ថិតនៅតាមបណ្ដោយផ្លូវជាតិលេខ៤ ភូមិអូដឹមសង្កាត់ ចោមចៅ៣ ខណ្ឌពោធិ៍សែនជ័យ ។
អ្នករងគ្រោះ របួសធ្ងន់ ហើយបានស្លាប់ ក្រោយបញ្ជូនដល់មន្ទីរពេទ្យ មិនត្រូវបានស្គាល់អត្តសញ្ញាណ ។ ចំណែកជនរងគ្រោះ ម្នាក់ទៀត ឈ្មោះ ភី ចំណាន ភេទប្រុស អាយុ៤៣ឆ្នាំ មុខរបរជាងដែក ស្នាក់នៅភូមិអូរដឹម សង្កាត់ចោមចៅ៣ មានស្រុកកំណើតភូមិត្រឡោកបែក ឃុំលើកដែក ស្រុកកោះធំ ខេត្តកណ្តាល រងរបួសបាក់ជើងស្តាំ ជាភាគីខាងម៉ូតូ ។
តាមប្រភពបានឲ្យដឹងថា មុនកើតហេតុ រថយន្ត ស៊ីណា ពណ៌ស ពាក់ស្លាកលេខ ភ្នំពេញ 2Y-4857 បើកល្បឿនលឿនពីកើតទៅលិច លុះដល់ចំណុចខាងលើ បែកកង់មុខខាងស្តាំ រេចង្កូតជ្រុលទៅបុកបង្គោលភ្លើង ហើយខណ:ដែល ម្ចាស់កំពុងធ្វើការដោះប្តូរកង់ ស្រាប់តែ រថយន្តម៉ាក សាំយ៉ុង ពណ៌ស្លែ ពាក់ស្លាកលេខភ្នំពេញ 2AA-0874 អ្នកបើកបរឈ្មោះ សំ មុំ ភេទប្រុស អាយុ២៤ឆ្នាំ មុខរបរ បើកបររថយន្តឈ្នួល មានទីលំនៅ ភូមិត្រពាំង ឃុំស្រែអំបិល ស្រុកស្រែអំបិល ខេត្តកោះកុង ត្រូវបានសមត្ថកិច្ចឃាត់ខ្លួន បានបើក ពីកើតទៅលិច ល្បឿនលឿនជ្រុលទៅបុកជនរងគ្រោះ២នាក់ ម្នាក់ជាអ្នកបើកបរ រថយន្តស៊ីណា ពណ៌ស ពាក់ស្លាកលេខ ភ្នំពេញ 2Y-4857 កំពុងអង្គុយដោះកង់សាគួររថយន្តពីក្រោយ( បានស្លាប់ ) ម្នាក់ទៀត ជាអ្នកអង្គុយមើល រងរបួសបាក់ជើង រុញផ្ទប់ នឹងរថយន្តតែម្តង និងបុកម៉ូតូ មួយគ្រឿងម៉ាក PCX ពណ៌ស ពាក់ស្លាកលេខ ភ្នំពេញ 1GD-5566 ។
ក្រោយកើតហេតុ ជនរងគ្រោះទាំង២នាក់ ត្រូវបានរថយន្តសង្រ្គោះរបស់អង្គភាព៧១១ ដឹកបញ្ជូនទៅមន្ទីរពេទ្យព្រះកុម: តែជាអកុសល ជនរងគ្រោះម្នាក់ ជាអ្នកបើកបររថយន្ត ស៊ីណា បានស្លាប់។
ចំណែករថយន្តទាំង២គ្រឿងម៉ូតូមួយគ្រឿង រួមទាំងអ្នកបើកបរ រថយន្តសាំយ៉ុង ម្នាក់ផង ត្រូវបានសមត្ថកិច្ចឃាត់នាំយកទៅរក្សាទុកនៅការិយាល័យចរាចរណ៍ជើងគោក ស្នងការក្រុងភ្នំពេញ រងចាំដោះស្រាយពេលក្រោយ ៕
មតិយោបល់