ភ្នំពេញ: ករណីគ្រោះថ្នាក់ចរាចរណ៍ រវាងរថយន្តបើកលឿនមិនប្រយ័ត្នទៅកៀរម៉ូតូមួយគ្រឿង ក្នុងទិសស្របទិសគ្នា បណ្តាលឲ្យដួលចូលក្រោមរថយន្តកុងតឺន័រមួយគ្រឿងទៀតកិនអូសជាង១០ម៉ែត្រ របួយធ្ងន់ស្រាល ២នាក់។
ហេតុការណ៍នេះ បានកើតទ្បើងកាលពីវេលាម៉ោង១១និង៤០នាទីយប់ថ្ងៃទី១១ ខែកុម្ភ: ឆ្នាំ២០១៩ ត្រង់ចំណុចក្បែរច្រកចូលបុរីអ័រគីដេ តាមបណ្តោយផ្លូវ២០០៤ ស្ថិតក្នុងសង្កាត់អូបែកក្អម ខណ្ឌសែនសុខ។
សមត្ថកិច្ច បានឲ្យដឹងថា នៅមុនពេលកើតហេតុគេឃើញ ម៉ូតូមាក់ហុងដាឌ្រីមមួយគ្រឿង ស៊េរី០១៦ ពណ៌ខ្មៅ ពាក់ស្លាកលេខ ភ្នំពេញ1FP-8279 ជិះគ្នា២នាក់ប្តី និងប្រពន្ធ កំពុងមានផ្ទះពោះជិតគ្រប់ខែ ធ្វើដំណើរតាមបណ្ដោយផ្លូវ២០០៤ ។
មកដល់ចំណុចកើតហេតុ ស្រាប់តែមានរថយន្តមិនស្គាល់ បើកបោះពួយយ៉ាងលឿង មិនប្រយ័ត្នទៅកៀរម៉ូតូ បណ្ដាលឲ្យដួលចូលក្រោមរថយន្តកុងតឺន័រ ម៉ាក VOLVO ពណ៌ស ពាក់ស្លាកលេខ ភ្នំពេញ3D-2370។ ដែលបើកបរតាមបណ្ដោយផ្លូវបេតុង ក្នុងទិសដៅពីជើងទៅត្បូង កិនអូសជាង១០ម៉ែត្រ រងការខូចខាតយ៉ាងដំណំ ចំណែកឯអ្នកជិះម៉ូតូជាប្តីបានខ្ទៀតចេញពីម៉ូតូរងរបួសបែកមុខបែកមាត់ រីឯប្រពន្ធដែលកំពុងផ្ទៃពោះជិតគ្រប់ខែសម្រាលរងរបួសស្រាលប៉ុណ្ណោះ។
ក្រោយកើតហេតុរថយន្តបង្ក បានបន្ថែមល្បឿនបើករត់គេចខ្លួនបាត់ស្រមោលដោយសុវត្ថិភាព។ ចំណែកអ្នកបើករថយន្តកុងតឺន័រ ក៏បានបើកទ្វារចុះពីលើរថយន្ត រត់គេចខ្លួនចេញពីកន្លែងកើតហេតុផងដែរ បន្សល់ទុកតែរថយន្ត ដែលកិនម៉ូតូជាប់ខាងក្រោម នៅកន្លែងកើតហេតុ។
បន្ទាប់ពីទទួលបានព័ត៌មានភ្លាម សមត្ថកិច្ច បានចុះដល់កន្លែងកើតហេតុ ធ្វើការវាស់វែង យករថយន្តនិងម៉ូតូ ទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយគ្នាពេលក្រោយ។ ចំណែកជនរងគ្រោះទាំងពីរនាក់ប្តីប្រពន្ធ ត្រូវបានរថយន្តសង្គ្រោះបន្ទាន់របស់គ្លីនិកសម្ភពរស្មី ដឹកយកទៅសង្គ្រោះភ្លាមៗផងដែរ៕
មតិយោបល់