Post News Media ព័ត៌មានជាតិ អាសូរណាស់!! គ...

អាសូរណាស់!! គ្រាន់តែដើរទិញបន្លែក្នុងផ្សារសោះ ក៏ត្រូវចរន្តអគ្គិសនីឆក់ផ្ដាច់ជីវិតស្លាប់មួយរំពេច

បាត់ដំបង: នៅថ្ងៃទី២៨ ខែឧសភា​ ឆ្នាំ២០១៩នេះ វេលាម៉ោង ៦និង៣០នាទីព្រឹក ស្ត្រី​ម្នាក់​​កំពុង​ដើរ​ទិញ​បន្លែ​ក្នុង​ផ្សារ ស្រាប់តែ​ប៉ះ​ចំ​គ្រែ​ដែក​ដែល​ឆ្លង​ចរន្ត​អគ្គិ​ស​នី ក៏បណ្ដាល​ឲ្យ​ស្លាប់ បង្ក​ការ​ភ្ញាក់ផ្អើល​ក្នុង​ផ្សា​រកំ​ប្រ៉​ង់ ភូមិ​កំ​ប្រ៉​ង់ ឃុំ​តា​ក្រី ស្រុក​កំ​រៀង ខេត្តបាត់ដំបង។

ជន​រង​គ្រោះឈ្មោះ​ ប៉ុន វ៉ា​ត អាយុ​ ៤០​ឆ្នាំ មុខរបរ​លក់ដូរ រស់នៅ​ភូមិ​កំពង់ចម្លង​លើ​ ឃុំ​តា​ក្រី ស្រុក​កំ​រៀង​។

ដំណើររឿង៖ មុនពេលកើតហេតុ ស្ត្រី​រង​គ្រោះកំពុង​ដើរ​ទិញ​បន្លែ​នៅ​ក្នុង​ផ្សារ ហើយ​ប៉ះ​ចំ​គ្រែ​ដែក​មាន​ឆ្លង​ចរន្ត​អគ្គិស​នី​ដែល​ដាក់​លក់ទំនិញ​នៅ​ក្នុង​ផ្សារ​នោះ ពេល​ត្រូវ​ចរន្ត​អគ្គិ​ស​នី​ឆក់ បណ្តាល​ឲ្យស្ត្រី​រង​គ្រោះ​ដួល​សន្លប់ តែ​ភ្លាម​ៗ​នោះ​ ត្រូវ​បាន​ក្រុម​គ្រួសារ​ និង​អ្នក​ភូមិ​ជួយ​ដឹក​ទៅ​សង្គ្រោះ​នៅមណ្ឌល​សុខភាព​មូលដ្ឋាន​ដែរ តែ​ស្ត្រី​រង​គ្រោះ​បាន​ស្លាប់​បាត់​ទៅ​ហើយ​។ យោង​តាម​ប្រភព​ពី​សាក្សី​បាន​និយាយ​ប្រាប់​ថា មូលហេតុ​ដែល​គ្រែ​ដែក​នោះ​មាន​ឆ្លង​ចរន្ត​អគ្គិស​នី គឺ​ដោយសារ​ម្ចាស់​គ្រែ​យក​កង្ហារ​ដែល​មាន​ខ្សែ​ដាច់​រលាត់​ដាក់​នៅ​លើ​គ្រែ ហើយ​ខ្សែភ្លើង​ដែល​មាន​​ដាច់​រលាត់​នោះ​ ប៉ះ​ជាប់​នឹង​គ្រែ​ដែក ទើប​ឆ្លង​ចរន្ត​ឆក់​ស្ត្រី​រង​គ្រោះ​​កំពុង​ដើរ​រក​ទិញ​បន្លែ​ក្នុង​ផ្សា​រ ​ស្លាប់​តែ​ម្ដង​។

ក្រោយកើតហេតុសមត្ថកិច្ច ចុះដល់ទីតាំងត្រួតពិនិត្យធ្វើកោសល្យវិច័យ បញ្ជាក់ថា គ្រែដែក​នោះ​ពិតជា​ឆ្លង​ចរន្ត​អគ្គិស​នី​ពី​ខ្សែ​កង្ហា​ដែល​ដាច់​រលាត់​មែន ដោយសារ​ម្ចាស់​មានការ​ធ្វេសប្រហែស​ ​ពេល​នេះ​មន្ត្រី​ជំនាញ​កំពុងធ្វើការ​សាកសួរ​ព័ត៌មាន និង​ធ្វើ​កំណត់ហេតុ​ប្រគល់​សព​ស្ត្រីជន​រង​គ្រោះ​ជូនក្រុម​គ្រួសារ​យក​ទៅ​ធ្វើបុណ្យ​តាម​ប្រពៃណី​​៕