Post News Media ព័ត៌មានជាតិ ក្រុមអ្នកបើករ...

ក្រុមអ្នកបើករថយន្តដឹកដីបាននាំគ្នាប្រមូលផ្តុំ នៅមុខសាលាខណ្ឌព្រែកព្នៅ

(ភ្នំពេញ)​ ​៖​ ក្រុម​អ្នកបើកបរ​រថយន្ត​ដឹក​ដី​ប្រមាណ​ជិត​ ​៣០​នាក់​ បាន​នាំ​គ្នា​​ប្រមូលផ្តុំ​នៅមុខ​សាលា​ខណ្ឌ​ព្រែក​ព្នៅ​ នា​ព្រឹក​ថ្ងៃ​ទី​២៤​ ខែមីនា​ ឆ្នាំ​២០១៦​ ដើម្បី​តវ៉ា​ជាមួយ​អាជ្ញាធរ​ខណ្ឌ​ ដោយ​ពួក​គាត់​បាន​ចោទប្រកាន់​ថា​ អាជ្ញាធរ​ខណ្ឌ​បាន​គាបសង្កត់​ទៅ​លើ​ពួក​គាត់​សឹងតែ​រក​ពេល​ប្រកប​មុខរបរ​សម្រាប់​ដោះស្រាយ​ជីវភាព​គ្រួសារ​មិន​បាន​ ទោះជាមានការបង់ប្រាក់ប្រចាំខែក្តី ។​
បើតាមក្រុមអ្នកបើករថយន្តដី​ ដែល​បាន​មក​តវ៉ា​នៅ​មុខ​សាលា​ខណ្ឌ​ បាន​ប្រាប់​អ្នកសារព័ត៌មាន​ថា​ អាជ្ញាធរ​ខណ្ឌ​បាន​បញ្ជា​ឲ្យ​សណ្តាប់ធ្នាប់​ខណ្ឌ​ធ្វើការឃាត់​រថយន្ត​របស់​ពួក​គេ​ទុក​ម្តង​២​ម៉ោង​ទៅ​៣​ម៉ោង​ ឲ្យ​មានការ​បង់ប្រាក់​ចូលមកសាលាខណ្ឌ ។​
​បើតាមប្រភពព័ត៌មា​នពីក្រុមអ្នកបើករថយន្តបានបន្តទៀតថា ហេតុអ្វីបានជាអាជ្ញាធរចាប់​តែ​រថយន្ត​ដឹក​ដី​តូចតាច​ ផ្ទុយ​ទៅ​វិញ​ការ​ដឹក​ជញ្ជូន​តាម​រថយន្ត​ធំៗ​ ដូច​ជា​ដែក​ ស៊ីម៉ង់ត៍​ និង​ផ្ទុក​លើស​ទម្ងន់​អត់​ដែលឃើញ​សណ្តាប់ធ្នាប់​ខណ្ឌ​ ឬ​អាជ្ញាធរ​បញ្ជា​ឲ្យ​ចុះចាប់​នោះ​ទេ​ ដូច្នេះ​ពួក​ខ្ញុំ​ឆ្ងល់​ថា​ ហេតុ​អ្វី​បានជាធ្វើបាប​តែ​ប្រជាពលរដ្ឋ​រកស៊ី​ឈ្នួលដឹក​ដី​ ដើម្បី​ដោះស្រាយ​ជីវភាព​គ្រួសារបែប​នេះទៅវិញ​ ។​
​​ក្រុម​អ្នកបើកបរ​រថយន្ត​ដឹក​ដី​បាន​បន្ត​ថា​ ការដែល​ឃាត់​រថយន្តទាំងនេះ​មិនមែន​សំខាន់​ទៅ​លើ​ការ​ផ្ទុក​លើស​ទម្ងន់​ ឬ​ដឹកដី​ជ្រុះ​ហុយ​នោះ​ទេ​ សំខាន់​គឺ​​ធ្វើ​យ៉ាងណា​ឲ្យ​តែខាងរថយន្តចូល​បង់ប្រាក់​ប្រចាំខែ​ ។ ពួក​គេ​បាន​បង់ប្រាក់​ក្នុង​មួយ​ខែ​ ២​ពាន់​ដុល្លារ​ឲ្យទៅលោក​ សុខ សម្បត្តិ រួច​ទៅ​ហើយ​ តែ​នៅមាន​បញ្ហា​មិន​ចេះ​ចប់​ ។ 
ក្រុមអ្នកដឹកដីបានប្រាប់ទៀតថា​ ប្រាក់ដែលពួកគេបានបង់នោះគឺឈ្មោះ​ ទី ឈ្មោះ​ រិន និងឈ្មោះ​ ហេង ជាអ្នកយកទៅជូនដោយផ្ទាល់​ ។ ក្រោយពីក្រុមអ្នកបើករថយន្តដឹកដីបានប្រាក់បង់ប្រចាំខែរួចហើយ ក៏នៅមានអ្នកអង្គុយចាំរាប់ក្បាលឡានយកលុយបន្ថែមទៀត​ ដោយក្នុងមួយគ្រឿង​ បានយកតំលៃ​ ២ដុល្លារ​ បានធ្វើឲ្យក្រុមអ្នកបើករថយន្តដឹកដីទាំងនោះ​ មិនពេញចិត្ត​ ។ 
​ក្រោយមកទើបឃើញខាងមន្ត្រីសាលាខណ្ឌចេញមកដោះស្រាយជាមួយពួកគាត់ដោយបានអះអាងថា សាលាខណ្ឌមិនដែលបានទទួលប្រាក់ពីឈ្មោះទាំងនោះទេ​ ។ ចំណែកឯខាងសាលាខណ្ឌបានបន្តទៀតថា​ ករណីរឿងរាប់ក្បាលឡានយកលុយក្នុងមួយគ្រឿង​ ២ដុល្លារនេះ​ គឺមិនមែនជាការពិតទេ​ ។ មន្ត្រីសាលាខណ្ឌបានបញ្ជាក់ថា​ បើមានមន្ត្រីណាមួយធ្វើបែបនេះ​ សូមឲ្យថតរូបមកបង្ហាញ​ ហើយនិងឈ្មោះមន្ត្រីដែលបានឈររាប់ក្បាលឡាននោះមកឲ្យគេ​ ។ ចំពោះប្រាក់ដែលក្រុមអ្នកបើករថយន្តដឹកដីផ្សេងៗបង់នោះ​ គឺយកមកស្ថាបនាផ្លូវថ្នល់ ៕​ 

    
    
    
 

Loading...