ពោធិ៍សាត់ៈ យោងតាមផេក ផ្សព្វផ្សាយអប់រំ ក្រសួងមហាផ្ទៃ បានឲ្យដឹងថា កាលពីថ្ងៃពុធ១៥ កើតខែភទ្របទ ឆ្នាំជូតទោស័ក ព.ស.២៥៦៤ ត្រូវនឹងថ្ងៃទី០២ ខែកញ្ញា ឆ្នាំ២០២០ វេលាម៉ោង ៤និង២៥នាទីល្ងាច មានយុវជនម្នាក់ស្រវឹងស្រាបើកម៉ូតូលឿនដូចហោះដល់ផ្លូវកោងជ្រុលចង្កូតដួលបោកក្បាលបណ្តាលឲ្យរងបួសធ្ងន់។ ករណីគ្រោះថ្នាក់ចរាចរណ៍នេះកើតឡើងនៅលើផ្លូវលំក្រាលកៅស៊ូ១ខ្សែ ស្ថិតនៅភូមិវាលវង់ ឃុំស្នាអន្សា ស្រុកក្រគរ ខេត្តពោធិ៍សាត់។
ប្រភពព័ត៌មានបានឲ្យដឹងថា មុនពេលកើតហេតុគេបានឃើញ ម៉ូតូម៉ាក HONDA Wave គ្មានផ្លាកលេខ ពណ៌ខ្មៅ ធ្វើចរាចរណ៍ពីត្បូងទៅជើង បើកបរដោយឈ្មោះ ចែម ចាន់រ៉ា អាយុ ១៨ឆ្នាំ ភេទប្រុស ជនជាតិខ្មែរ រស់នៅ ភូមិ ឃុំអូរសណ្ដាន់ ស្រុកក្រគរ ខេត្តពោធិ៍សាត់ បើកម៉ូតូក្នុងល្បឿនលឿនដូចហោះ មកដល់ចំណុចកើតហេតុត្រង់ផ្លូវកោងបត់មិនទាន់ បានជ្រុលទៅបុកបង្គោលដាក់តាមផ្លូវកោងបណ្តាលឲ្យដួលបោកក្បាល រងរបួសធ្ងន់។
ក្រោយពេលកើតហេតុ ជនរងគ្រោះត្រូវបានគេបានបញ្ជូនទៅព្យាបាលនៅមន្ទីរពេទ្យបង្អែកខេត្តពោធិ៍សាត់។
លោកវរសេនីយ៍ឯក ឯម រុន អធិការនគរបាលស្រុកក្រគរបានបញ្ជាក់ថា ក្រោយពេលដែលសមត្ថកិច្ចនគរបាល បានចុះពិនិត្យដល់កន្លែងកើតហេតុ និងបានសន្និដ្ឋានថា ករណីគ្រោះថ្នាក់ចរាចរណ៍នេះ បណ្តាលមកពីកត្តាល្បឿននិងកត្តាស្រវឹងស្រា។
សមត្ថកិច្ចបានយកម៉ូតូមករក្សាទុក នៅប៉ុស្តិ៍នគរបាលរដ្ឋបាល ស្នាអន្សាជាបណ្ដោះអាសន្ន៕
មតិយោបល់