ពោធិ៍សាត់: យោងតាមផេកអគ្គស្នងការដ្ឋាននគរបាលជាតិបានឲ្យដឹងថា កម្លាំងនគរបាលស្រុកវាលវែង កាលពីវេលាម៉ោង៨និង០៦នាទីព្រឹក ថ្ងៃទី៦ ខែកញ្ញា ឆ្នាំ២០២០ បានចាប់ខ្លួនជនសង្ស័យម្នាក់ពាក់ព័ន្ធករណីប្លន់ ដែលបានរត់គេចខ្លួនអស់រយ:ពេលជាង១០ឆ្នាំ ។
គួររំលឹកថា ជនសង្ស័យខាងលើនេះ បានធ្វើសកម្មភាពប្លន់នៅខេត្តបាត់ដំបង កាលពីថ្ងៃទី២៩ កុម្ភ: ២០០៨ នៅភូមិកណ្តាលស្ទឹង ឃុំអណ្តើកហែប ស្រុករតន:មណ្ឌល ខេត្តបាត់ដំបង ហើយគេចខ្លួនមករស់នៅចំណុចអូររំចេក ភូមិសំឡាញ ឃុំក្រពើពីរ ស្រុកវាលវែង ខេត្តពោធិ៍សាត់ ។
តាមរបាយការណ៍របស់ លោកអធិការនគរបាលស្រុកវាលវែង បានឲ្យដឹងថា ការចាប់ខ្លួនជនសង្ស័យខាងលើ គឺសមត្ថកិច្ចធ្វើឡើងដោយអនុវត្ត តាមដីកាបង្គាប់ឲ្យចាប់ខ្លួន លេខ៣៦៥ បទខ ចុះថ្ងៃទី១៥ ខែមិថុនា ឆ្នាំ២០០៩ របស់ចៅក្រមស៊ើបស៊ើបសួរនៃសាលាដំបូងខេត្តបាត់ដំបង។ លោកអធិការ បានបន្តថា ដោយទទួលបានដីកាចាប់ខ្លួនរបស់សាលាដំបូងខេត្តបាត់ដំបងសមត្ថកិច្ចបានតាមស្វែងរកជនល្មើសអស់រយ:ពេលជាង១០ឆ្នាំ ទម្រាំចាប់ខ្លួនជនសង្ស័យឈ្មោះ រឿង និមល នេះបាន ។ ក្រោយពីនគរបាលស្រុកវាលវែង នៃស្នងការដ្ឋាននគរបាលខេត្តពោធិ៍សាត់ ចាប់ខ្លួនជនសង្ស័យខាងលើនេះរួចមក សមត្ថកិច្ចក៏បានកសាងសំណុំរឿងបញ្ជូនឲ្យកម្លាំងជំនាញស្រុករតន:មណ្ឌល ខេត្តបាត់ដំបង មកទទួលយកទៅចាត់ការតាមនីតិវិធីបន្ត ៕
មតិយោបល់