ស្វាយរៀងៈ នៅវេលាម៉ោង០៣និង៤៥នាទីរសៀលថ្ងៃទី១២ ខែសីហា ឆ្នាំ២០២១ មានករណីគ្រោះថ្នាក់ចរាចរណ៍ មួយកើតឡើង រថយន្តពីរគ្រឿងបើកបរប្រជែងបណ្តាលឲ្យប៉ះគ្នា ជ្រុលចង្កូតទៅបុកស្ត្រីពីរនាក់ម្តាយនិងកូន បណ្តាលឲ្យស្លាប់និងរងរបួសធ្ងន់ ស្ថិតក្នុងភូមិប្រាសាទ ឃុំសំបួរ ស្រុករមាសហែក ខេត្តស្វាយរៀង ។

ស្ត្រីដែលស្លាប់ឈ្មោះ ព្រុំ ផល្លា អាយុ៥៣ឆ្នាំ និងអ្នករងរបួសធ្ងន់ឈ្មោះ សេក សុខ ភេទស្រី អាយុ៣២ឆ្នាំ ត្រូវជាកូន ទាំងពីរនាក់នេះ មានទីលំនៅក្នុងភូមិ-ឃុំកើតហេតុ ។

នៅមុនពេលកើតហេតុ គេឃើញរថយន្តមួយគ្រឿងម៉ាក កាមរីបាឡែន ពណ៌ស្ករ និងរថយន្តមួយគ្រឿងទៀតម៉ាកកាមរីឆ្លាម ពណ៌ប្រផេះ ពាក់ស្លាកលេខភ្នំពេញ ២N-១៧០៩ បើកបរស្របទិសគ្នា ខណៈបើកមកដល់ត្រង់ចំណុចកើតហេតុ ស្រាប់តែរថយន្ត កាមរីបាឡែន បើកជែងរថយន្តកាមរីឆ្លាម ប៉ះគ្នាជ្រុលចង្កូតបុកជនរងគ្រោះទាំងពីរនាក់ កំពុងឈរនៅមុខផ្ទះពេញទំហឹង បណ្តាលឲ្យ ស្រ្តីជាម្តាយស្លាប់ និងកូនស្រីរងរបួសធ្ងន់ ។ ជនរងគ្រោះរបួសធ្ងន់ ត្រូវបានដឹកបញ្ជូនទៅសង្គ្រោះនៅមន្ទីរពេទ្យ ។ ចំណែកសាកសពក្រោយពីសមត្ថកិច្ចធ្វើកំណត់ហេតុរួច បានប្រគល់ឲ្យក្រុមគ្រួសារយកធ្វើបុណ្យតាមប្រពៃណី ៕