ពោធិ៍សាត់: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា បុរសម្នាក់ស្លាប់នៅនឹងកន្លែងកើតហេតុ ក្នុងឧបទ្ទវហេតុគ្រោះថ្នាក់ចរាចរណ៍ ម៉ូតូជិះបុកបង្កាន់ដៃស្ពាន ករណីនេះកើតឡើងនៅ​ចំណុចលើស្ពានក្រសារ (ផ្លូវ​កោង​)​ ផ្លូវក្រាលកៅស៊ូ ស្ថិតនៅភូមិ ចុងខ្លុង ឃុំអូរសណ្តាន់ ស្រុកក្រគរ ខេត្តពោធិ៍សាត់ កាលពីវេលាម៉ោង ២១និង ៣០នាទី ថ្ងៃទី​១២ ខែកញ្ញា ឆ្នាំ ២០២១ ។

ប្រភពព័ត៌មាននៅកន្លែងកើតហេតុ បានប្រាប់ឲ្យដឹងថា មុនពេលកើតហេតុ គេឃើញមានបុរសម្នាក់ ជិះម៉ូតូមួយគ្រឿងក្នុងល្បឿនលឿន ធ្វើដំណើរក្នុងទិសដៅពី​ត្បូង​ទៅ​ជើង មកដល់ចំណុចផ្លូវកោង ស្ពានក្រសារ អ្នកបើកបរគ្រប់គ្រងម៉ូតូលែងបាន ក៏ជ្រុលទៅបុកបង្កាន់ដៃស្ពាន រួចធ្លាក់ចូលទៅក្នុងទឹក ដោយឃើញហេតុការណ៍ដូចនេះប្រភពបាន នាំគ្នាទៅជួយលើកជនរងគ្រោះចេញពីទឹក តែជាអកុសលរូបគេ បានស្លាប់ បាត់ទៅហើយ ។

លោកវរសេនីយ៍ទោ ស៊ុយ ម៉ៅ អធិការរង នៃអធិការដ្ឋាននគរបាលស្រុកក្រគរ បានបញ្ជាក់ឲ្យដឹងថា ក្នុងករណីគ្រោះថ្នាក់ចរាចរណ៍ខាងលើ គឺស្លាប់មនុស្សម្នាក់ឈ្មោះ ទាំ វណ្ណសូត្រ អាយុ​ ២៧ឆ្នាំ​ ភេទប្រុស​ ជនជាតិ​ ខ្មែរ​ឥស្លាម រស់នៅ​ភូមិ​ ចុងខ្លុង ឃុំ អូរសណ្តាន់ ស្រុកក្រគរ ខេត្ត​ពោធិ៍សាត់​ ស្លាប់នៅនឹងកន្លែងកើតហេតុ និងខូចខាតម៉ូតូមួយគ្រឿងម៉ាក HONDA C125 ពណ៌ខ្មៅ ពាក់​ផ្លាក​លេខ​ ពោធិ៍សាត់ 1. K 5794 ។

ដោយមូលហេតុ ប្រើប្រាស់ល្បឿនលឿន ។ លោកអធិការបានបន្តថា បច្ចុប្បន្នសាកសពជនរងគ្រោះ ត្រូវសមត្ថកិច្ចបានធ្វើកំណត់ហេតុ ប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី ៕