-

បង្ក្រាបករណីជួញដូរគ្រឿងញៀន ចាប់ខ្លួនជនសង្ស័យ០៥នាក់ និងរឹបអូសវត្ថុតាងជាង៥០,០០០គ្រាប់

ភ្នំពេញ: យោងតាមផេក Anti-Drug Department បានឲ្យដឹងថា សមត្ថកិច្ចជំនាញនៃមន្ទីរប្រឆាំងបទល្មើសគ្រឿងញៀន បង្ក្រាបករណីជួញដូរគ្រឿងញៀន ចាប់ខ្លួនជនសង្ស័យ០៥នាក់ និងរឹបអូសគ្រឿងញៀនជាង ៥០,០០០គ្រាប់ នៅរាជធានីភ្នំពេញ និងសៀមរាប ។

អនុវត្តតាមបញ្ជា ឯកឧត្តម នាយឧត្ដមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និង ឯកឧត្តម នាយឧត្ដមសេនិយ៍ ម៉ក់ ជីតូ អគ្គស្នងការរងទទួលផែនប្រឆាំងបទល្មើសគ្រឿងញៀន ក្រោមការបញ្ជាដឹកនាំផ្ទាល់ របស់ ឯកឧត្តម ឧត្ដមសេនីយ៍ឯក ឡឹក វណ្ណ: នាយកមន្ទីរប្រឆាំងបទល្មើសគ្រឿងញៀន ។

កាលពីថ្ងៃទី២៩ ខែតុលា ឆ្នាំ ២០២១ វេលាម៉ោង១០និង៣០នាទី កម្លាំងជំនាញនៃមន្ទីរប្រឆាំងគ្រឿងញៀន (ក៧) ដឹកនាំដោយ លោក ឧត្តមសេនីយ៍ទោ សឿង ណុល នាយករងមន្ទីរ និងចូលរួមសហការពីកម្លាំងជំនាញ នៃស្នងការដ្ឋាននគរបាលខេត្តសៀមរាប ព្រមទាំងមានការសម្របសម្រួលពីលោក វង្ស សសាវ៉ាត ពីព្រះរាជអជ្ញារង នៃអយ្យកាអមសាលាដំបូងរាជធានីភ្នំពញ និងលោក ផេង សំណាង ព្រះរាជអាជ្ញារង នៃអយ្យកាអមសាលាដំបូងខេត្តសៀមរាប បានធ្វើការស៊ើបអង្កេត ស្រាវជ្រាវ បង្រ្កាបករណីជួញដូរគ្រឿងញៀន នៅចំណុច តាមបណ្តោយផ្លូវ វិមានឈ្នះ (ទំនប់កប់ស្រូវ) ភូមិត្រពាំងពោធិ៍ស សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ចាប់ជនសង្ស័យបាន០២នាក់ប្រុស និងថ្នាំញៀនមេតំហ្វេតាមីនគ្រាប់ (WY) ចំនួន ២០.០០០គ្រាប់ ។

នៅថ្ងៃទី២៩ ខែតុលា ឆ្នាំ២០២១ វេលាម៉ោង ១៧និង៣០នាទី បន្តការស៊ើបអង្កេត ឈានទៅចាប់ខ្លួនជនសង្ស័យបាន០៣នាក់ ស្រីម្នាក់ទៀត និងឆែកឆេរលំនៅដ្ឋាន នៅចំណុចភូមិជ្រៃ ឃុំកណ្តែក ស្រុកបាគ ខេត្តសៀមរាប រកឃើញថ្នាំញៀន មេតំហ្វេតាមីន ប្រភេទគ្រាប់ (WY) ចំនួន ៣០.០០០គ្រាប់បន្ថែមទៀត ។

លទ្ធផលសរុប៖
ក-ឃាត់ខ្លួនជនសង្ស័យ០៥នាក់
១-ឈ្មោះ ខុង ខុម ភេទប្រុស អាយុ ៤០ឆ្នាំ ជនជាតិ ខ្មែរ ។
២-ឈ្មោះ អាត នឿត ភេទប្រុសអាយុ ៤០ឆ្នាំ ជនជាតិ ខ្មែរ ។
៣-ឈ្មោះ សល់ សេងលី ភេទប្រុស អាយុ ៣៨ឆ្នាំ ជនជាតិ ខ្មែរ ។
៤-ឈ្មោះ លឹម ហេង ភេទប្រុសអាយុ ៥១ឆ្នាំ ជនជាតិ ថៃ ។
៥-ឈ្មោះ សឹម សត្យា ភេទស្រី អាយុ ៣៨ឆ្នាំ ជនជាតិ ខ្មែរ ។

ខ-វត្ថុតាងចាប់យកបានសរុប៖
-ថ្នាំញៀនប្រភេទ មេតំហ្វេតាមីនគ្រាប់ (WY) ចំនួន ៥៦.៣៩៧ គ្រាប់ ស្មើទម្ងន់ ៥ គ.ក្រ ០៧៥.៧៩ក្រាម ។

បច្ចុប្បន្ន ជនសង្ស័យ និងវត្ថុតាងខាងលើ កម្លាំងសមត្ថកិច្ចបានកសាងសំណុំរឿង បញ្ជូនទៅសាលាដំបូងរាជធានីភ្នំពេញ ដើម្បីបន្តចាត់ការតាមនីតិវិធីច្បាប់ ៕

មតិយោបល់