ពោធិ៍សាត់: យោងតាមផេក ផ្សព្វផ្សាយអប់រំ ក្រសួងមហាផ្ទៃ បានឲ្យដឹងថា បុរសចូលចិត្តដើរលេងដាច់យប់ម្នាក់ ត្រូវបាននគរបាលស្រុកក្រគរឃាត់ខ្លួន យកមកកាន់អធិការរដ្ឋាន បន្ទាប់ពីប្រើហិង្សាវាយឪពុកចុងនិងម្ដាយបង្កើតឲ្យទ្រមខ្លួន ខណ:ដែលមកពីដើរលេងពួកគាត់ស្ដីប្រដៅ ។
ហេតុការណ៍ហិង្សានេះ បានកើតឡើងនៅវេលាម៉ោង៦និង០០នាទីព្រឹកថ្ងៃទី១ ខែឧសភា ឆ្នាំ២០២២ ស្ថិតក្នុងភូមិក្រឡាញ់ ឃុំក្បាលត្រាច ស្រុកក្រគរ ខេត្តពោធិ៍សាត់ ។
បើតាមផ្នែកជំនាញកិច្ចការនេះ នៃអធិការដ្ឋាននគរបាលស្រុកក្រគរប្រាប់ឲ្យដឹងថា ជនដែលប្រើហិង្សាឈ្មោះ តាំ លាស់ ភេទប្រុស អាយុ ២៧ ឆ្នាំ ជនរងគ្រោះឈ្មោះ លី សិច អាយុ ៥៣ ឆ្នាំ ត្រូវជាឪពុកចុង ព្រមទាំងជនរងគ្រោះម្ដាយបង្កើតម្នាក់ទៀត ទាំងអស់គ្នានៅក្នុងបន្ទុកគ្រួសារតែមួយនៅភូមិ-ឃុំកើតហេតុខាងលើ ។
ផ្នែកនគរបាលជំនាញដដែលបានបន្តថា បើតាមចម្លើយជនរងគ្រោះពីរនាក់ប្ដីប្រពន្ធ ដែលមុខសញ្ញាប្រើហិង្សាមកលើពួកគាត់បានរៀបរាប់ថា ជារៀងរាល់យប់កូនរបស់ពួក
គាត់បានដើរលេងរាល់យប់ហើយជិតភ្លឺ និងពេលខ្លះដាច់យប់ក៏មាន ។ លុះពួកគាត់ទ្រាំមិនបាន ពេលគេមកពីដើរលេង ក៏បានស្ដីប្រដៅកូនថា អត់គិតដេកយប់ទេអី បើពិបាកពេកទិញថ្នាំពុលលេបសម្លាប់ខ្លួនតែម្ដងទៅ ភ្លាមនោះកូនរបស់គាត់នោះ បានស្ទុះមកវាយពួកគាត់ទាំងពីរនាក់ប្ដីប្រពន្ធ បណ្ដាលឲ្យទ្រមខ្លួនតែម្ដង ។
មន្រ្តីជំនាញដដែលបន្ថែមថា បើតាមជនសង្ស័យដែលបានប្រើហិង្សាដាក់ម្ដាយបង្កើតនិងឪពុកចុងនោះ គឺរូបគេពិតជាបានវាយមែនដោយសារខឹងឪពុក ថាឲ្យខ្លួនទៅទិញថ្នាំពុលលេបសម្លាប់ ហើយវាយគេមុន១ដៃ ក៏ទ្រាំមិនបានវាយអ្នកទាំងពីរទៅ ហើយករណីហិង្សាគ្រួសារនេះ លោកព្រះរាជអាជ្ញាខេត្ត បានបញ្ជាឲ្យឃាត់ខ្លួនជនសង្ស័យនិងបញ្ជូនមកអធិការដ្ឋាននគរបាលស្រុកក្រគរ ដើម្បីបំពេញបែបបទតាមនីតិវិធីបន្ត៕
មតិយោបល់