មិចស៊ិចកូ:កាលពីថ្ងៃអាទិត្យមនុស្សទាំង៧នាក់ដែលបានស្លាប់ដោយសារបានស្រូបផ្សែងពុលនៅក្នុងរោងចក្រផលិតស្រាបៀររបស់ក្រុមហ៊ុន Grupo Modelo ដ៏ល្បីមួយនៅក្នុងប្រទេសមិចស៊ិចកូសុទ្ធតែជាកម្មករដែលធ្វើការនៅទីនោះ។
នៅក្នុងសន្និសិទ្ធកាសែតមួយដែលលោក Francisco Javier Lopez Bravo ប្រធានការងារប្រតិបត្តិនៃក្រុមហ៊ុនភេសជ្ជះ Grupo Modelo បាននិយាយថាពួកគេបានស្លាប់ដោយសារតែពួកគេបានទៅលាងសម្អាតអាងទឹកមួយដែលនៅជាប់នឹងធុងផ្ទុកហ្គាសនៅក្នុងរោងចក្រមួយក្នុងចំណោមរោងចក្រជាច្រើនទៀតដែលមានទីតាំងនៅក្នុងទីក្រុងនៃប្រទេសមិចស៊ិចកូ។
លោកបាននិយាយបន្តទៀតថាបើទោះបីជាយ៉ាងណាក៏ដោយវានឹងមិនមានការប៉ះពាល់អាក្រក់ណាមួយទៅលើប្រជាជនដែលរស់នៅជិតតំបន់នោះទេហើយកម្មករដទៃទៀតក៏នឹងមិនមានបញ្ហាណាគ្រោះថ្នាក់កើតឡើងចំពោះពួកគាត់ដែរ។លោក Bravo បានបន្ថែមទៀតថាក្រុមហ៊ុនមានការសោកស្តាយជាទីបំផុតចំពោះគ្រោះថ្នាក់លើកនេះហើយក្រុមហ៊ុននឹងព្យាយាមជួយនិងទទួលខុសត្រូវចំពោះគ្រួសារជនរងគ្រោះទាំងអស់។
ការស៊ើបអង្កេតនៅតែបន្តបើទោះជាពេលនេះគេបានដឹងច្បាស់ថាឧស្ម័នពុលដែលផ្ទុកទៅដោយសារធាតុកាបូននិងម៉ូណូស៊ីដ។
គួរបញ្ជាក់ផងដែរថា ក្រុមហ៊ុនផលិតស្រាបៀរ Grupo Modelo របស់មិចស៊ិចកូ បានចាប់ផ្តើមផលិតស្រាបៀរដំបូងនៅ ឆ្នាំ ១៩២៥ ដោយផលិតស្រាបៀរល្បីរបស់ខ្លួនឈ្មោះ Corona និងស្រាបៀរល្បីៗផ្សេងទៀត៕
មតិយោបល់