ប្រទេសអ៊ីរ៉ង់ មានគម្រោងបង្កើនការផលិតដែកថែបឲ្យបាន ៥៥លានតោននៅក្នុងឆ្នាំ ២០១៥ ដើម្បីបង្កើនការនាំចេញ និងប្រាក់ចំណូល។
យោងតាមការចុះផ្សាយរបស់ទីភ្នាក់ងារព័ត៌មានចិន ស៊ិនហួ បានចុះផ្សាយដោយដកស្រង់នូវសំដីរបស់លោក Mohammad-Jafar Sarqini ឧបនាយករដ្ឋមន្ត្រី និងជារដ្ឋមន្ត្រីក្រសួងឧស្សាហកម្មអ៊ីរ៉ង់ បានមានប្រសាស៍ថា ដែកថែបជាវត្ថុធាតុដែលសំខាន់ សម្រាប់នាំចេញទៅបរទេស ហើយការនាំចេញគឺគ្មានដែនកំណត់ឡើយ គិតចាប់ពីចុងខែមិថុនា ខាងមុខនេះ ។
សមាគមអ្នកផលិតដែកថែបពិភពលោក បានចេញសេចក្តីប្រកាសព័ត៌មានថា អ៊ីរ៉ង់ បានផលិតដែកថែបសរុបចំនួន ១៤.០៧១លានតោន គិតក្នុងអំឡុងពេល១១ខែ ក្នុងឆ្នាំ២០១៣កន្លងទៅនេះ ។ តួលេខនេះបានកើនឡើង៦ភាគរយ បើធៀបនឹងអំឡុងពេលដូចគ្នានៅក្នុងឆ្នាំ២០១២ ។
រដ្ឋាភិបាលអ៊ីរ៉ង់ បានគ្រោងនឹងផលិតដែកថែប ដោយបង្កើនឲ្យបាន ៥៥លានតោន នៅចុងឆ្នាំ២០១៥ នេះជាគម្រោងការបង្កើនការអភិវឌ្ឍន៍ រយៈពេល៥ឆ្នាំរបស់អ៊ីរ៉ង់ ៕
មតិយោបល់