(បន្ទាយមានជ័យ)៖ ថ្ងៃទី២៨ ខែមេសា ឆ្នាំ២០២១ លោកឧត្តមសេនីយ៍ទោ សេង ធារិន មេបញ្ជាការរង នាយសេនាធិការយោធភូមិភាគទី៥ បានអញ្ជើញចុះត្រួតពិនិត្យសកម្មភាពកងកម្លាំងចម្រុះធ្វើការបិទខ្ទប់ ភូមិសាស្រ្តក្រុងប៉ោយប៉ែតទាំងមូលជាបណ្តោះអាសន្ន ក្រុងប៉ោយប៉ែត ខេត្តបន្ទាយមានជ័យ តាមបទបញ្ជារបស់ ឯកឧត្តម អ៊ុំ រាត្រី អភិបាល នៃគណអភិបាល​ខេត្តបន្ទាយមានជ័យ ដោយក្នុងក្រុងប៉ោយប៉ែតបានរកឃើញអ្នកវិជ្ជមានជាបន្តបន្ទាប់ដែលជាហានិភ័យខ្ពស់ នៃការចម្លង និងការឆ្លងរីករាលដាលនៃជំងឺកូវីដ-១៩ ចូលសហគមន៍។

លោកឧត្តមសេនីយ៍ទោ សេង ធារិន មានប្រសាន៍បញ្ជាក់ថា ស្ថិតនៅក្នុងស្ថានភាពដ៏លំបាកនេះកងកម្លាំងចម្រុះ​ និងអាជ្ញាធរបានខិតខំប្រឹងប្រែងទាំងយប់ទាំងថ្ងៃ ដើម្បីសុខសុវត្ថិភាព ជូនប្រជាពលរដ្ឋ ក៏ដូចជាប្រទេសជាតិ និងសូមអង្វរចិត្តពុកម៉ែបងប្អូនប្រជាពលរដ្ឋ ដែលរស់នៅក្នុងក្រុងប៉ោយប៉ែត សូមចូលរួមអនុវត្ត វិធានការ ៣កុំ ៣ការពារ និងកាត់ផ្តាច់ឲ្យខានតែបាន នូវការឆ្លងរីករាលដាលចូលសហគមន៍។