ចូលឆ្នាំ ២០២២ភ្លាម មកទល់ពេលនេះ ឃើញថា អត្រានៃយុវជន យុវនារីសម័យ ថ្មី ហាក់មានភាពមិនប្រក្រតី ដោយសារតែពួកគេតែងតែមានវិបត្តិ រឿងស្នេហាធ្ងន់ធ្ងរ ។

គេសង្កេតឃើញមានករណីប៉ុនប៉ងលោតទឹកសម្លាប់ខ្លួន នៅទីតាំងស្ពាននានា ជាពិសេសគឺស្ពានជ្រោយចង្វា ស្ថិតក្នុងភូមិសាស្ត្រ សង្កាត់ស្រះចក ខណ្ឌដូនពេញ រាជធានីភ្នំពេញ ដែលមានការកើនឡើងគួរឱ្យកត់សម្គាល់ មានរហូតដល់ទៅ ០៥ ករណីឯណោះ គិតចាប់ពីដើមឆ្នាំ មកទល់នឹងថ្ងៃទី ១១ ខែមករា ឆ្នាំ ២០២២ នេះ។ជាក់ស្ដែងករណីទាំងនោះមានដូចជា ៖

១. ករណីយប់ថ្ងៃទី ០២ ខែមករា ឆ្នាំ ២០២២
នាយប់ថ្ងៃទី ០២ ខែមករា ឆ្នាំ ២០២២ កន្លងទៅ មានករណីយុវតីរូបស្រស់មួយរូប បានសម្រេចចិត្តទៅលោតទឹកសម្លាប់ខ្លួន លើទឹកដីស្ពានជ្រោយចង្វា ស្ថិតក្នុងភូមិសាស្ត្រ សង្កាត់ស្រះចក ខណ្ឌដូនពេញ រាជធានីភ្នំពេញ បង្កជាការភ្ញាក់ផ្អើលដល់អ្នកនៅក្បែរនោះទាំងយប់។
ទាក់ទិនទៅនឹងរឿងរ៉ាវខាងលើ បើតាមគណនីមួយដែលមានឈ្មោះ ង៉ូវ ដាលីន បានបង្ហោះរៀបរាប់ឱ្យបានដឹងថា កាលពីចុងឆ្នាំចាស់កន្លងទៅ ស្ត្រីខាងលើធ្លាប់ប៉ងទៅលោតទឹកម្តង តែមិនបានសម្រេច រហូតមកដល់ដើមឆ្នាំថ្មីទើបមកម្តងទៀត នៅតែមិនបានសម្រេច ព្រោះត្រូវបានគេឃាត់ទាន់ពេលវេលា។

២. ករណីយប់ថ្ងៃទី ០៣ ខែមករា ឆ្នាំ ២០២២
នៅយប់ថ្ងៃទី ០៣ ខែមករា ឆ្នាំ ២០២២ មានករណីស្ត្រីម្នាក់ ប៉ុនប៉ងលោតទឹកសម្លាប់ខ្លួន នៅលើស្ពានព្រែកសំរោង ក្រុងតាខ្មៅ ខេត្តកណ្ដាល តែត្រូវអ្នកបើករម៉កលក់ភេសជ្ជៈឃាត់ទាន់ ទើបទាក់ទងទៅសមត្ថកិច្ច ខលហៅប្ដី និង គ្រួសារឱ្យមកទទួលទៅផ្ទះវិញ។

៣. ករណី ថ្ងៃទី ០៥ ខែមករា ឆ្នាំ ២០២២
នៅថ្ងៃទី ០៥ ខែមករា ឆ្នាំ ២០២២ មានករណីស្ត្រីអាយុជាង ៤០ ឆ្នាំ បានជិះម៉ូតូកូនទា តម្រង់ទៅស្ពានព្រះមុន្នីវង្ស ប៉ុនប៉ងលោតទឹកសម្លាប់ខ្លួន តែត្រូវបានអ្នកនៅក្បែរនោះ ឃាត់ទាន់ពេលវេលា។
ដោយឡែកបើតាមប្រភពបានបញ្ជាក់ឱ្យបានដឹងថា មូលហេតុដែលនាំស្ត្រីខាងលើសម្រេចចិត្តបែបនេះ ដោយសារតែ តូចចិត្ត និង សាច់ញាតិមិនចែកទ្រព្យសម្បត្តិរបស់ម្ដាយដែលបន្សល់ទុកមុនពេលចែកឋាន។

៤. ករណីយប់ថ្ងៃទី ០៩ ខែមករា ឆ្នាំ ២០២២
នាយប់ថ្ងៃទី ០៩ ខែមករា ឆ្នាំ ២០២២ មានករណីយុវតីរូបស្រស់មួយរូប មានឈ្មោះកូកូ បានសម្រេចចិត្តមកលោតទឹកសម្លាប់ខ្លួន នៅលើស្ពានជ្រោយចង្វា តែត្រូវបានអ្នកនៅក្បែរទីតាំងកើតហេតុឃាត់ទាន់ពេលវេលា ទើបមានបុរសម្នាក់ និង មិត្តភក្តិមកទទួលត្រឡប់ទៅផ្ទះវិញ។ ក្នុងនោះបើតាមប្រភពបានបញ្ជាក់ផងដែរថា មូលហេតុដែលស្ត្រីខាងលើប៉ុនប៉ងលោតទឹកបញ្ចប់ជីវិត គឺដោយសារមិត្តប្រុសរបស់ខ្លួនឈ្មោះធី ប្រែដោះដៃ ក្រោយទើបស្គាល់គ្នាបានប្រមាណ ២ ខែ។

៥. ករណីយប់ថ្ងៃទី ១០ ខែមករា ឆ្នាំ ២០២២
នាយប់ថ្ងៃទី ១០ ខែមករា ឆ្នាំ ២០២២ កន្លងទៅ មានករណីក្មេងស្រីម្នាក់ បានប៉ុនប៉ងលោតទឹកសម្លាប់ខ្លួនលើស្ពានជ្រោយចង្វា នាវេលាម៉ោង ១១ និង ៤០ នាទីយប់ ដោយពុំដឹងច្បាស់ថាមានវិបត្តិអ្វីនោះឡើយ ខណៈដែលស្ត្រីរូបនេះ ត្រូវបានយុវតីចំនួន ០៣ នាក់ នាំគ្នាមកចាប់ឃាត់ទាន់ពេលវេលា ជួយសង្រ្គោះបានសម្រេច នៅចំណុចលើស្ពានជ្រោយចង្វា ស្ថិតក្នុងភូមិសាស្ត្រ សង្កាត់ស្រះចក ខណ្ឌដូនពេញ រាជធានីភ្នំពេញ៕