ភ្នំពេញ ÷ រថយន្តស៊េរីទំនើបមួយគ្រឿង បើកបរក្នុងល្បឿនលឿន បានរេចង្កូតបុ.កទម្លុះចូលផ្ទះប្រជាពលរដ្ឋ ទាំងកណ្តាលយប់ បណ្តាលឲ្យរងការខូចខាតទ្វារ និងសសរបាក់អស់មួយចំនួនធំ។

ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ១និង៣០នាទីរំលងអធ្រាត្រ ឈានចូលថ្ងៃទី៨ ខែកុម្ភៈ ឆ្នាំ២០២២ ស្ថិតនៅតាមបណ្តោយផ្លូវ២០០៥ ក្នុងសង្កាត់គោកឃ្លាង ខណ្ឌសែនសុខ រាជធានីភ្នំពេញ។

យោងតាមប្រភពព័ត៌មាន ពីកន្លែងកើតហេតុបានប្រាប់ឲ្យដឹងថា មុនកើតហេតុគេបានឃើញរថយន្តស៊េរីទំនើប មួយគ្រឿង ពណ៌ខ្មៅពាក់ផ្លាកលេខ ភ្នំពេញ2AV-86 17 បើកបរតាមបណ្តោយផ្លូវ២០០៥ ក្នុងទិសដៅពីត្បូងមកជើង ក្នុងល្បឿនយ៉ាងលឿន លុះមកដល់ចំណុចកើតហេតុ បានរេចង្កូតជ្រុលទៅបុ.កទម្លុះចូលផ្ទះប្រជាពលរដ្ឋ បណ្តាលឲ្យរងការខូចខាតសសរ និងទ្វាររួមទាំងសម្ភារៈមួយចំនួន ចំណែករថយន្តបង្កវិញ រងការខូចខាតខ្ទេចមួយកំណាត់មុខស្ទើរទាំងស្រុង។ ហើយភ្លាមនោះដែរ ម្ចាស់រថយន្តបង្ក បានគេចចេញពីកន្លែងកើតហេតុបាត់ស្រមោល។

ក្រោយកើតហេតុខាងលើសមត្ថកិច្ចមូលដ្ឋាន បានចុះមកដល់រួចក៏ទំនាក់ទំនង ទៅជំនាញចរាចរណ៍ ចុះយកយករថយន្តស្ទូច មកស្ទូចយករថយន្តបង្ក ទៅរក្សាទុកនៅ អធិកាដ្ឋាននគបាលខណ្ឌសែនសុខ រងចាំម្ចាស់មកដោះស្រាយ នៅពេលក្រោយ៕