រតនគិរីៈ កម្លាំងបរិស្ថានដែនជម្រកសត្វព្រៃលំផាត់ បានសហការជាមួយកម្លាំងនគរបាលនៃអធិការដ្ឋានស្រុកលំផាត់ ចុះបង្ក្រាប និងរឹបអូសទូក១គ្រឿងផ្ទុកដោយឈើសុក្រំ ។
ប្រតិបត្តិការចុះបង្ក្រាបនេះ ធ្វើឡើងកាលពីថ្ងៃទី១២ ខែតុលា ឆ្នាំ២០១៦ ត្រង់ចំណុចអូរបក តាមបណ្តោយដងទន្លេស្រែពក ស្ថិតក្នុងភូមិកែងសាន់ ឃុំសេដា ស្រុកលំផាត់ ខេត្តរតនគិរី ។

លោកវរសេនីយ៍ត្រី ថេង ចន្ទីធី បានឲ្យដឹងនៅព្រឹកថ្ងៃទី១៣ ខែតុលានេះថា កម្លាំងរបស់លោកបានសហការជាមួយកម្លាំងបរិស្ថានដែនជម្រកសត្វព្រៃលំផាត់ ចុះល្បាតតាមតំបន់ដែនជម្រក និងតាមដងទន្លេស្រែពកក៏ប្រទះឃើញទូក១គ្រឿងផ្ទុកឈើសុក្រំចំនួន៤៨សន្លឹក និងមានម៉ាស៊ីនចំនួន៤គ្រឿង ដោយឡែកម្ចាស់បទល្មើសមិនឃើញមានមុខនៅទីនោះឡើយ។

លោកបានបន្តទៀតថា ទូក១គ្រឿង និងឈើសុក្រំចំនួន៤៨សន្លឹកនេះ បានប្រគល់ទៅឲ្យជំនាញរដ្ឋបាលព្រៃឈើខណ្ឌ ដើម្បីចាត់ការតាមនិតិវិធីច្បាប់រួចហើយ ៕