បន្ទាយមានជ័យ: បុរសជើងខ្លាំងខាងបាញ់បោះសេរី ដែលតែងតែអុកឡុកក្នុងក្រុងប៉ោយប៉ែត ត្រូវកម្លាំងនគរបាលធ្វើការចាប់ខ្លួនបាន កាលពីយប់ ថ្ងៃទី១៤ ខែតុលា ឆ្នាំ២០១៦ នៅមុខភោជនីយដ្ឋាននាគទិព្វ ភូមិក្បាលស្ពាន២ សង្កាត់ប៉ោយបែត ក្រុងប៉ោយបែត ខេត្តបន្ទាយមានជ័យ។

លោក ធិន ស៊ិនដេត អធិការ នៃអធិការដ្ឋាន ក្រុងប៉ោយប៉ែតបានឲ្យដឹងថា មុខសញ្ញាដែលឃាត់ខ្លួនឈ្មោះ វ៉ាង ចន្ថា
ហៅឌីង ដុង អាយុ២៣ឆ្នាំ ភេទប្រុស ស្នាក់នៅបន្ទប់ជួល ភូមិក្បាលស្ពាន២ សង្កាត់-ក្រុងប៉ោយបែត មុខរបរមិនប្រាកដ ។ មុខសញ្ញានេះបានធ្វើសកម្មភាពបាញ់បោះជាច្រើនលើកហើយតែងគេចផុតពីការចាប់ខ្លួនរបស់សមត្ថកិច្ច ​។

លោកបានបញ្ជាក់ថា កាលពីវេលាម៉ោង១១និង៣០នាទីយប់ ថ្ងៃទី៣ ខែតុលា ឆ្នាំ២០១៦ ជនសង្ស័យនិងបក្សពួក បានបាញ់ជាច្រើនគ្រាប់នៅចំនុចភូមិបាលិលេយ្យ២ និងបាញ់នៅដើមស្រល់កាស៊ីណូ រួចគេចខ្លួនបាត់បន្ទាប់ពីសមត្ថកិច្ចមកដល់ ។ ដោយទទួលបានពត៌មាន និងភិនភាគជនសង្ស័យនេះ សមត្ថកិច្ចធ្វើការតាមដាន រហូតដល់កំណត់មុខសញ្ញា ឈានដល់ការចាប់ខ្លួនបាននៅយប់ ថ្ងៃទី១៤ ខែតុលា នេះតែម្តង ។

ក្នុងប្រតិបត្តិការឃាត់ខ្លួននោះ សមត្ថកិច្ចដកហូតបានអាវុធខ្លី K59 មួយដើម មានគ្រាប់២គ្រាប់ បង់កាំភ្លើង១ និង ម៉ូតូម៉ាកហុងដាCBRពណ៌ក្រហម ១គ្រឿង ពាក់ផ្លាកលេខ ភ្នំពេញ1C-H6768 ។

បច្ចុប្បន្នជនសង្ស័យត្រូវសមត្ថកិច្ចកសាងសំណុំរឿងបញ្ជូនមកកាន់សាលាដំបូងខេត្តដើម្បីចាត់ការតាមនីតិវិធី ៕