ពិធីបុណ្យស្រូវ និងចំបើង នឹងធ្វើឡើងនៅខេត្តសៀមរាប ចាប់ពីថ្ងៃនេះ រហូតដល់ថ្ងៃទី ២២ ខែមករា ដែលស្ថិតក្រោមកិច្ចសហប្រតិបត្តិការកម្ពុជា-កូរ៉េ។ នេះបើយោងតាមការឲ្យដឹងកាលពីពេលថ្មីៗនេះពីគេហទំព័រមន្ទីរទេសចរណ៍ខេត្តសៀមរាប។

ពិធីបុណ្យនេះ នឹងធ្វើឡើងនៅភូមិកន្រ្តក សង្កាត់សំបួរ ក្រុងសៀមរាប ខេត្តសៀមរាប ដែលជាផលិតផលទេសចរណ៍ថ្មីមួយ សម្រាប់ខេត្តសៀមរាប ដែលរំពឹងទាក់ទាញភ្ញៀវទេសចរណ៍ បានកាន់តែច្រើន។

ពិធីបុណ្យស្រូវ និងចំបើង នឹងបង្ហាញពីសក្តានុពលនៃវិស័យកសិ-ទេសចរណ៍ របស់កម្ពុជា ទៅកាន់ភ្ញៀវជាតិ និងអន្តរជាតិ ដែលក្រៅពីប្រាសាទ កម្ពុជាក៏មានវប្បធម៌ ប្រពៃណី ទំនៀមទម្លាប់ដ៏ទាក់ទាញផងដែរ។

គួរបញ្ជាក់ដែរថា បុណ្យស្រូវ និងចំបើងលើកទី ១ និងទី​ ២ បានធ្វើឡើងនៅក្នុងខេត្តបន្ទាយមានជ័យ ហើយបានទាក់ទាញភ្ញៀវទេសចរណ៍ជាច្រើន ហើយពិធីបុណ្យនេះ អាចនឹងធ្វើឡើងនៅខេត្តផ្សេងៗទៀត ដែលមានសក្តានុពលកសិ-ទេសចរណ៍ផងដែរ៕