លោកឧកញ៉ា ម៉ុង ឫទ្ធី បានចាប់ដៃគូជាមួយ ក្រុមហ៊ុនប៉ូឡូញ គ្រោងនឹងបង្កើតរោងចក្រកែច្នៃសាច់ ឲ្យបានឆាប់បំផុត ដើម្បីសង្គ្រោះដល់កសិករកម្ពុជា ដែលកំពុងរងគ្រោះដោយសារការនាំចូលសត្វរស់ ពីប្រទេសជិតខាង។ នេះបើយោងតាមការឲ្យដឹង នៅលើគេហទំព័រហ្វេសប៊ុករបស់លោកឧកញ៉ា ម៉ុង ឫទ្ធី កាលពីម្សិលមិញនេះ។

តាមរយៈការផ្លាស់ប្តូរដំណើរទស្សនកិច្ចទៅវិញទៅមករវាង ប្រតិភូកម្ពុជា និងប៉ូឡូញ ដើម្បីស្វែងរកដំណោះស្រាយតម្លៃសាច់ជ្រូក និងសាច់មាន់ បានបង្ហាញឲ្យដឹងថា ដើម្បីប្រកួតប្រជែងជាមួយប្រទេសជិតខាងបាន លុះត្រាតែកម្ពុជា រកបច្ចេកទេសទំនើបទាន់សម័យ សាងសង់រោងចក្រកែច្នៃសាច់ ប្រកបដោយគុណភាព និងធានាបាននូវ សុវត្ថិភាពចំណីអាហារជាចម្បង។

លោក Mariusz Lesiuk ដែលមានរោងចក្រកែច្នៃសាច់ និងមានបទពិសោធន៍ជាង ៥០ឆ្នាំមកហើយនោះ បានស្វែងយល់ពីសក្តានុពលការអភិវឌ្ឍន៍លើ ដំណាំកសិកម្មកសិឧស្សាហកម្មរបស់ក្រុមហ៊ុន ម៉ុង ឫទ្ធី ក៏បានសន្យាប្រមូលទិញស្វាយ និងម្រេចពីប្រទេសកម្ពុជា ដើម្បីនាំចេញទៅប្រទេសប៉ូឡូញផងដែរ។

គួរជម្រាបដែរថា នៅសប្តាហ៍ក្រោយនេះ លោកឧកញ៉ា ម៉ុង ឫទ្ធី នឹងដឹកនាំគណប្រតិភូកម្ពុជា ទៅកាន់ប្រទេសហុងគ្រី និងបារាំង ដើម្បីស្វែងរកទីផ្សារកសិផលរបស់កម្ពុជា និងទាក់ទាញវិនិយោគិន មកកម្ពុជាផងដែរ៕