ក្រុមហ៊ុនធានារ៉ាប់រង H.I Micro Insurance បានបោះទុនប្រមាណ ៣០លានដុល្លារអាមេរិក ស្ថិតក្រោមការវិនិយោគរួមគ្នារវាង វិនិយោគិនកម្ពុជា ថៃ និងអូស្រ្តាលី ដើម្បីលក់សេវាកម្មធានារ៉ាប់រងលើ គ្រោះថ្នាក់ចរាចរណ៍នៅតាមដងផ្លូវ។ នេះបើយោងតាម ទីភ្នាក់ងារសារព័ត៌មានជាតិ ចេញផ្សាយកាលពីពេលថ្មីៗនេះ។

លោក សារិន រ៉ាត់ណាត់ដាណៃ អគ្គនាយកក្រុមហ៊ុន H.I Micro Insurance បានឲ្យដឹងថា ការសម្រេចចិត្តបង្កើតក្រុមហ៊ុននេះ គឺដោយសារការមើលឃើញពី អត្រាគ្រោះថ្នាក់ចរាចរនៅកម្ពុជា នៅមានកម្រិតខ្ពស់ ដែលបណ្តាលឲ្យមានអត្រាមនុស្សស្លាប់ និងពិការភាពច្រើន បង្កជាបន្ទុកធ្ងន់ធ្ងរផ្នែកហិរញ្ញវត្ថុដល់ក្រុមគ្រួសារ។

ក្រុមហ៊ុនថ្មីនេះ​ នឹងបម្រើដល់ប្រជាពលរដ្ឋ ក្នុងការការពារអាយុជីវិត ចំពោះបញ្ហាគ្រោះថ្នាក់ចរាចរណ៍ ដែលមិនដឹងមុន។

តាមការឲ្យដឹងពីមន្រ្តីជំនាញ វិស័យធានារ៉ាប់រង បានដើរតួនាទីសំខាន់ក្នុងការជម្រុញសេដ្ឋកិច្ចជាតិ ព្រោះគិតត្រឹមឆមាសទី ១ ចំណូលបុព្វលាភបានមកពីវិស័យនេះ គឺប្រមាណ ១៨.៥លានដុល្លារ កើនឡើង ១១៣ភាគរយ ធៀបនឹងរយៈពេលដូចគ្នា កាលពីឆ្នាំមុន។

គួរជម្រាបដែរថា គិតត្រឹមរយៈពេល ៥ឆ្នាំចុងក្រោយនេះ បុព្វលាភដុល ក្នុងឧស្សាហកម្មទីផ្សារធានារ៉ាប់រងទូទៅ សម្រេចបានកំណើន ២០ភាគរយជាមធ្យមក្នុង១ឆ្នាំ ដោយគិតចាប់ពីឆ្នាំ ២០១០ ដល់ ២០១៥ ហើយនឹងមានកម្រិតខ្ពស់ជាងនេះទៀត បើបូកបញ្ចូលបុព្វលាភធានារ៉ាប់រងអាយុជីវិត និងការធានារ៉ាប់រងខ្នាតតូច៕