ក្រុមហ៊ុន Techno Park Poi Pet បានបើកសម្ពោធជាផ្លូវការ នៅតំបន់សេដ្ឋកិច្ចពិសេស សានកូ ប៉ោយប៉ែត ដែលស្ថិតនៅក្រុងប៉ោយប៉ែត ខេត្តបន្ទាយមានជ័យ។ នេះបើយោងតាមការឲ្យដឹងពី គេហទំព័ររបស់ ក្រុមប្រឹក្សាអភិវឌ្ឍន៍កម្ពុជា។
ក្រុមហ៊ុន Techno Park Poi Pet ជាក្រុមហ៊ុនបុត្រសម្ព័ន្ធនៃក្រុមហ៊ុន Toyota Tsusho Corporation ហើយបច្ចុប្បន្នមានទីតាំងលើផ្ទៃដី ៤ហិកតា និងទទួលគម្រោងវិនិយោគពី ៥ក្រុមហ៊ុន ដែលមានសកម្មភាពផលិតគ្រឿងបន្លាស់រថយន្ត សម្ភារ:បរិក្ខារ អេឡិកត្រូនិក និងខ្សែបង្គុំអគ្គិសនី ដែលបង្កើតការងារប្រមាណ ១៥០កន្លែង និងកើនដល់ ៤០០កន្លែង នៅឆ្នាំ ២០១៨ខាងមុខនេះ។
លោក សុខ ចិន្តាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជា បានចាត់ទុកថា ក្រុមហ៊ុននេះ គឺជាមេដែក និងកម្លាំងចលករដ៏មានប្រសិទ្ធភាព ក្នុងការទាក់ទាញ និងស្រូបយកក្រុមហ៊ុនវិនិយោគដទៃទៀត មកក្នុង តំបន់សេដ្ឋកិច្ចពិសេស សានកូ ប៉ោយប៉ែត។
លើសពីនេះទៅទៀត សកម្មភាពនេះ នឹងចូលរួមចំណែកក្នុងការធ្វើពិពិធកម្មវិនិយោគនៅកម្ពុជា ផ្ទេរនូវចំណេះ ជំនាញ បទពិសោធន៍ការងារ ជាពិសេសគឺបង្កើតការងារជាច្រើន។
គួរជម្រាបថា បច្ចុប្បន្នគម្រោងវិនិយោគជប៉ុន ដែលបានកត់ត្រាដោយក្រុមប្រឹក្សាអភិវឌ្ឍន៍កម្ពុជា មានចំនួន ១១៥គម្រោង ក្នុងទុនវិនិយោគសរុបប្រមាណជាង ១ប៊ីលានដុល្លារអាមេរិក និងបង្កើតការងារ ៣៦០០០កន្លែង។ ដោយឡែកនៅក្រុងប៉ោយប៉ែត បច្ចុប្បន្នមានតំបន់សេដ្ឋកិច្ចពិសេសចំនួន ៣ ដែលទទួលបានគោលការណ៍វិនិយោគពី រាជរដ្ឋាភិបាល និងមានក្រុមហ៊ុនវិនិយោគសរុប ១៥ក្រុមហ៊ុន ដោយបានស្រូបយកកម្លាំងពលកម្មប្រមាណ ៣៥០០កន្លែង៕
មតិយោបល់