ព័ត៌មានសេដ្ឋកិច្ច

ត្រឹមឆ្នាំ ២០២០ កម្ពុជា-ថៃ ប្តេជ្ញាបង្កើនទំហំពាណិជ្ជកម្មទ្វេភាគីឲ្យបាន ១៥ពាន់លានដុល្លារ

នៅក្នុងកិច្ចប្រជុំគណ:កម្មការចម្រុះផ្នែកពាណិជ្ជកម្មរវាងកម្ពុជា-ថៃលើកទី៦ (6th JTC) ដែលមានរយ:ពេលពីរថ្ងៃ គឺចាប់ពីថ្ងៃទី២១ ដល់ទី​ ២២ ខែកុម្ភ: ឆ្នាំ២០១៨ កម្ពុជា និងថៃ​ បានប្តេជ្ញាជំរុញទំហំពាណិជ្ជកម្មទ្វេភាគីឲ្យបាន ១៥ពាន់លានដុល្លារអាមេរិក នៅត្រឹមឆ្នាំ ២០២០។

កិច្ចប្រជុំនេះ​ ប្រព្រឹត្តទៅក្រោមគណ:អធិបតីភាព ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មនៃព្រះរាជាណាចក្រកម្ពុជា និងឯកឧត្តម សុនធិរ៉ាត់ សុនធិជីរ៉ាវង្ស (Sontirat Sontijirawong) រដ្ឋមន្ត្រីក្រសួងពាណិជ្ជកម្ម នៃព្រះរាជាណាចក្រថៃឡង់ដ៏ និងមានការចូលរួមពីមន្ត្រីជាន់ខ្ពស់ និងតំណាងវិស័យឯកជននៃប្រទេសទាំងពីរ ប្រមាណជាង ១០០នាក់ ដើម្បីផ្លាស់ប្តូរយោបល់លើបញ្ហាប្រឈមថ្មីនានាដូចជា ការនាំចូលជ្រូក ខ្សែភាពយន្ត ប្រេងឥន្ធន: ពីប្រទេសថៃមកកាន់ប្រទេសកម្ពុជា និងការអនុវត្តច្បាប់គយថ្មីរបស់ថៃ។

ក្រៅពីការបង្កើនទំហំពាណិជ្ជកម្ម ភាគីកម្ពុជា បានស្នើភាគីថៃ បន្ថែមរយ:ពេលនៃការនាំចូលពោតពីកម្ពុជា រហូតដល់ខែតុលា រៀងរាល់ឆ្នាំ ដែលពីមុនការនាំចូលពោតមានរយ:ពេលតែប្រាំខែប៉ុណ្ណោះ​ (ខែមីនា ដល់ខែសីហា)។

លើសពីនេះ ភាគីទាំងពីរបានឯកភាពបង្កើតក្រុមការងារចម្រុះ ដែលនឹងត្រូវកោះប្រជុំលើកទី១របស់ខ្លួន នៅក្នុងរយ:ពេល ៣ខែ បន្ទាប់ពីកិច្ចប្រជុំ 6th JTC។

ទន្ទឹមគ្នានេះ ភាគីទាំងពីរក៏បានពិភាក្សាអំពីកិច្ចសហប្រតិបត្តិការជាច្រើនរួមមាន កិច្ចសហប្រតិបត្តិការសម្រួលពាណិជ្ជកម្ម កិច្ចសហប្រតិបត្តិការបើកច្រកព្រំដែន កិច្ចសហប្រតិបត្តិការវិស័យពាណិជ្ជកម្ម និងវិនិយោគ ជាដើម។

នៅចុងបញ្ចប់នៃកិច្ចប្រជុំ រដ្ឋមន្ត្រីពាណិជ្ជកម្មនៃប្រទេសទាំងពីរ ក៍បានចុះហត្ថលេខាលើឯកសារចំនួនពីរ គឺ (១) យុទ្ធសាស្ត្រកំណើននៃកិច្ចសហប្រតិបត្តិការសេដ្ឋកិច្ចតាមបណ្តាខេត្តជាប់ព្រំដែន និង (២) អនុស្សរណ:ស្តីពីកិច្ចសហប្រតិបត្តិការជំរុញពាណិជ្ជកម្ម៕

មតិយោបល់