ភ្នំពេញៈ ក្រុមហ៊ុន Arakawa របស់ប្រទេសជប៉ុន ចង់សហការជាមួយរាជរដ្ឋាភិបាលកម្ពុជា ដោយបានស្នើសុំគោលការណ៍ណែនាំ ក្នុងការអភិវឌ្ឍន៍ អគារប៊ូឌីញស ឡើងវិញ។ នេះបើតាមការលើកឡើងកាលពីពេលថ្មីៗនេះ របស់លោក ជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់។

ក្រុមហ៊ុន Arakawa បានជួបពិភាក្សាជាមួយលោក ជា សុផារ៉ា ព្រមទាំងមន្រ្តីជំនាញសាលារាជធានីភ្នំពេញ ដើម្បីស្នើសុំគោលការណ៍ណែនាំ និងពិនិត្យមើលលទ្ធភាព លើការអភិវឌ្ឍន៍អគារប៊ូឌីញស ដែលស្ថិតនៅភូមិ១ និងភូមិ២ សង្កាត់ទន្លេបាសាក់ ខណ្ឌចំការមន។

កាលពីខែសីហា កន្លងទៅនេះ លោក ជា សុផារ៉ា បានបង្ហាញពីចំណាប់អារម្មណ៍ ក្នុងការសាកល្បងអនុវត្តគម្រោងសាងសង់លំនៅដ្ឋានមានតម្លៃសមរម្យ សម្រាប់ប្រជាពលរដ្ឋ ដែលមានចំណូលទាប និងមធ្យម ដោយនៅគ្រោងចំណាយ ៣០លានដុល្លារអាមេរិកលើការអភិវឌ្ឍន៍នេះ។

យ៉ាងណាមិញ មុននឹងឈានដល់ការអភិវឌ្ឍន៍ឡើងវិញ ក្រសួងរៀបចំដែនដី នគរូបនីយកម្ម និងសំណង់ ចាំបាច់ធ្វើជំរឿន ដើម្បីបានដឹងពីចំនួនគ្រួសារ និងទំហំផ្ទៃអគារ ដែលពួកគេកាន់កាប់។

លោក ប៉ា សុជាតិវង្ស អភិបាលរាជធានីភ្នំពេញ ធ្លាប់បានលើកឡើងដែរថា អគារនេះ មានលក្ខណៈចាស់ទ្រុឌទ្រោមខ្លាំង ដែលអាចបាក់ស្រុត និងបង្កជាគ្រោះថ្នាក់ដល់ប្រជាពលរដ្ឋនៅក្នុងតំបន់នោះផងដែរ។

គួរបញ្ជាក់ថា ស្ថាបត្យករខ្មែរ លោក លូ បានហាប់ បានចាប់ដៃគូជាមួយនឹង ស្ថាបត្យកររុស្ស៊ីលោក Vladimir Bodiansky រចនាអគារនេះឡើង និងសម្ភោធឲ្យប្រើប្រាស់ជាផ្លូវការនៅឆ្នាំ ១៩៦៣៕