ក្រុមហ៊ុនមកពីខេត្តជីលីន ប្រទេសចិន បានសម្តែងការចាប់អារម្មណ៍ លើការវិនិយោគលើ ហេដ្ឋារចនាសម្ព័ន្ធកែច្នៃស្រូវនៅកម្ពុជា នឹងបានជួបពិភាក្សាជាមួយលោក ប៉ាន សូរស័ក្តិ រដ្ឋមន្រ្តីនៃក្រសួងពាណិជ្ជកម្ម កាលពីម្សិលមិញនេះ។
ក្រុមហ៊ុន បានបង្ហាញពីចំណាប់អារម្មណ៍ ក្នុងការវិនិយោគលើការសាងសង់ឡសម្ងួត ឃ្លាំងស្តុកស្រូវ និងរោងម៉ាស៊ីនកិនស្រូវ ដែលមានលក្ខណៈបច្ចេកទេសខ្ពស់ អាចផលិតបានអង្ករមានស្តង់ការទទួលស្គាល់ជាអន្តរជាតិ សម្រាប់នាំចេញទៅកាន់បរទេស ឲ្យកាន់តែច្រើន។

បច្ចុប្បន្ន ក្រុមហ៊ុន Jilin Province Investment Group Co.Ltd. បានសុំការគាំទ្រពីក្រសួងពាណិជ្ជកម្ម លើការចុះអនុស្សរណៈយោគយល់ជាមួយសហព័ន្ធស្រូវអង្ករកម្ពុជា។

កាលពីពេលថ្មីៗនេះ ក្រសួងពាណិជ្ជកម្ម និងក្រុមហ៊ុន កូហ្វកូ របស់ចិន បានព្រមព្រៀងលើអនុស្សរណៈយោគយល់គ្នាស្តីពីការធ្វើពាណិជ្ជកម្មអង្ករ ដែលនឹងជម្រះផ្លូវសម្រាប់ការនាំចេញអង្កររបស់កម្ពុជា ប្រមាណ ២សែនតោនទៅប្រទេសចិន៕