ព័ត៌មានសេដ្ឋកិច្ច

ពលរដ្ឋអគារប៊ូឌីញ រើឥវ៉ាន់ចេញរួច ១០០% អាចផ្តិតមេដៃ យកសែកបើកលុយបាន

ប្រជាពលរដ្ឋ ដែលបានរើឥវ៉ាន់ចេញពីអគារប៊ូឌីញរួចរាល់ ១០០ភាគរយហើយនោះ គឺអាចឲ្យខាងក្រុមហ៊ុន មកពិនិត្យ និងធ្វើកិច្ចសន្យាជាមួយម្ចាស់ផ្ទះ ផ្តិតមេដៃទទួលស្គាល់ថា បានរើចេញរួចរាល់ ១០០ភាគរយ នឹងអាចទៅបើកសែកប្រាក់ នៅក្រសួងរៀបចំដែនដី នគរូបនីយកម្មនិងសំណង់។

តាមការឲ្យដឹងពីប្រជាពលរដ្ឋអគារប៊ូឌីញ គឺបញ្ជាក់ថា ទំហំទឹកប្រាក់ ដែលពួកគាត់ទទួលបាន គឺអាស្រ័យទៅលើទំហំបន្ទប់ដែលគាត់រស់នៅ ពោលគឺ ចន្លោះពី ១០ ដល់ ៥០ម៉ែត្រការ៉េ គិតជាទឹកប្រាក់ប្រមាណ ១៤,០០០ ដល់ ៧០,០០០ដុល្លារអាមេរិក។

យ៉ាងណាមិញ ទំហំជាមធ្យមនៅជាន់លើ គឺចន្លោះពី ៣០ ទៅ ៣៥ម៉ែត្រការ៉េ គិតជាទឹកប្រាក់ប្រមាណ ៥ម៉ឺនដុល្លារអាមេរិក។

គួររម្លឹកដែរថា ក្រោយការជួបពិភាក្សារវាងលោក ជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្មនិងសំណង់ និងប្រជាពលរដ្ឋប្រមាណ ៤០០គ្រួសារ លើបញ្ហាការអភិវឌ្ឍន៍អគារប៊ូឌីញនេះ គឺ មកទល់ពេលនេះ ប្រជាពលរដ្ឋជាង ៩០ភាគរយ បានចុះកិច្ចសន្យាយល់ព្រមលក់ ក្នុងតម្លៃ ១៤០០ដុល្លារអាមេរិក ក្នុងមួយម៉ែត្រការ៉េ។

ពលរដ្ឋទាំងអស់ បាននិងកំពុងចាកចេញចាប់ពីថ្ងៃទី ៦ មិថុនា ដល់ ទី ៦ កក្កដានេះ ដោយទទួលបានប្រាក់ឧបត្ថម្ភ ១០០ដុល្លារអាមេរិក សម្រាប់ការរើឥវ៉ាន់ ហើយអ្នករើឥវ៉ាន់ចេញពីបន្ទប់អគារនេះរួចរាល់ នឹងទទួលបានសែកទៅបើកនៅធនាគារភ្លាមៗ។

លើសពីនេះទៅទៀត នៅថ្ងៃទី ១០ ខែមិថុនាខាងមុខនេះ នឹងមានការរៀបចំពិធីជប់លៀងសាមគ្គីអបអរសាទរគម្រោងអគារប៊ូឌីញ ស ដែលជាការលាគ្នាចុងក្រោយនៃពលរដ្ឋធ្លាប់រស់នៅទីនោះ។

សម្រាប់ការអភិវឌ្ឍន៍អគារថ្មី ក្រសួង នឹងសហការជាមួយក្រុមហ៊ុន Arakawa ចាប់ផ្តើមសាងសង់លើគម្រោងសាងសង់អគារថ្មី ២១ជាន់ ដោយចំណាយទឹកប្រាក់ប្រមាណ ៨០លានដុល្លារអាមេរិក។

អគារថ្មីនេះ នឹងមានចំណតចំនួន ៣ជាន់, កន្លែងលក់ដូរ ១ជាន់ និងកន្លែងស្នាក់នៅ ៥ជាន់ ហើយចាប់ពីជាន់ទី ៩ឡើងទៅ ជាកម្មសិទ្ធិវិនិយោគរបស់ក្រុមហ៊ុន Arakawa៕

មតិយោបល់