អាមេរិកៈ មនុស្សរាប់រយនាក់ រួមទាំងមន្ត្រីរាជការខ្លះផង ត្រូវបានចាប់ខ្លួននៅទូទាំងសហរដ្ឋអាមេរិក បន្ទាប់ពីពួកគេបានចូលរួម ក្នុងការតវ៉ាដោយអំពាវនាវឱ្យមានប្រាក់ឈ្នួលអប្បបរមាខ្ពស់ជាងមុន និងសិទ្ធិសហជីពពលកម្ម កាន់តែប្រសើជាងមុន។ នេះបើយោងតាមសារព័ត៌មាន CNN ចេញផ្សាយនៅថ្ងៃទី៣០ ខែវិច្ឆិកា ឆ្នាំ២០១៦។

តាមមន្រ្តីសហជីព បានឲ្យដឹងថា បាតុកម្មនេះ មានឈ្មោះថា ប្រយុទ្ធសម្រាប់១៥ ដុល្លារ ជាចលនាអន្ដរជាតិមួយ ដែលមានមូលដ្ឋាននៅសហរដ្ឋអាមេរិក ដើម្បីទាមទារប្រាក់ឈ្នួលអប្បបរមា១៥ដុល្លារ ក្នុងមួយម៉ោង សម្រាប់កម្មករ មានប្រាក់កម្រៃទាប ដែលបានធ្វើឡើងកាលពីថ្ងៃអង្គារ ដោយមានមនុស្សរាប់រយនាក់មកពីទីក្រុងនានា ក្នុងសហរដ្ឋអាមេរិក រួមទាំងរដ្ឋមជ្ឈមណ្ឌលពាណិជ្ជកម្ មនៅទីក្រុងញូវយ៉ក ទីក្រុងឈីកាហ្គោ និងទីក្រុង Los Angeles ។

សូមជំរាបថា ការធ្វើបាតុកម្មនេះ ជាចលនាសហជីពធំបំផុត ចាប់តាំងពីការធ្វើបាតុកម្មនៅក្នុងឆ្នាំ ២០១២។ ការធ្វើបាតុកម្ម ប្រយុទ្ធសម្រាប់១៥ ដុល្លារ ត្រូវបានគ្រោងនឹងធ្វើក្នុងទីក្រុងសហរដ្ឋអាមេរិកទាំង ៣៤០ និងព្រលានយន្តហោះចំនួន ២០ នៅទូទាំងប្រទេស៕