ឥណ្ឌា: មន្រ្តីនាយកដ្ឋានឧតុនិយម នៅថ្ងៃព្រហស្បតិ៍នេះ បានឲ្យដឹងថា រលកកម្ដៅដ៏ខ្លាំង បានវាយប្រហារនៅផ្នែកមួយចំនួន ក្នុងប្រទេសឥណ្ឌា ជាមួយនឹងសីតុណ្ហភាពកើនឡើងដល់ ៤៥ អង្សាសេ។ នេះបើយោងតាមរយ: សារព័ត៌មានចិនស៊ិនហួ ចេញផ្សាយនៅថ្ងៃទី២០ ខែមេសា ឆ្នាំ២០១៧។

វិទ្យុផ្លូវការទាំងអស់របស់ឥណ្ឌា (AIR) បានឲ្យដឹងថា នៅភាគខាងត្បូងរដ្ឋ Telangana ចាប់តាំងពីដើមខែនេះ មនុស្សយ៉ាងហោចណាស់ ៣៧ នាក់ ត្រូវស្លាប់ដោយសាររលកកម្ដៅ។

តាមសេចក្តីថ្លែងការណ៍ ដែលចេញផ្សាយដោយក្រសួងឧតុនិយម បាននិយាយថា កាលពីម្សិលមិញ លក្ខខណ្ឌរលកកម្ដៅដ៏ធ្ងន់ធ្ងរ បានជះឥទ្ធិពលដល់កន្លែងជាច្រើន នៅរដ្ឋ Punjab, Haryana, Jharkhand, Madhya Pradesh, Madhya Maharashtra , Uttar Pradesh, ទីក្រុង Chandigarh និង Delhi។

សូមជំរាបថា កាលពីថ្ងៃពុធ សីតុណ្ហភាពអតិបរមាខ្ពស់បំផុត ៤៦,២ អង្សាសេ នៅទីក្រុង Chandrapur ក្នុងរដ្ឋ Maharashtra ចំណែកឯទីក្រុង Delhi វិញមានសីតុណ្ហភាព ៤៤ អង្សាសេ៕