ជប៉ុន: យន្តហោះចម្បាំង Mitsubishi F-2 របស់ជប៉ុន គ្រោងនឹងបំពាក់ជាមួយមីស៊ីល មហាល្បឿន បន្ទាប់ពីរដ្ឋាភិបាលក្រុងតូក្យូ បានមើលឃើញថា កំពុងមានការរីករាលដាលនូវការគំរាមកំហែង ពីសំណាក់កងទ័ពជើងទឹកចិន ។ នេះបើយោងតាមសារព័ត៌មាន Spunitk ចេញផ្សាយនៅថ្ងៃទី០១ ខែសីហា ឆ្នាំ២០១៧។
ប្រភពពីកាសែត Yomiuri Shimbun បានឲ្យដឹងថា «ការណែនាំឲ្យបំពាក់មីស៊ីលថ្មីនេះ បានធ្វើទ្បើងក្នុងគោលបំណងតាមដានឲ្យទាន់សភាពការណ៍នូវកងទ័ពជើងទឹកចិន ដែលកំពុងមានសកម្មភាពខ្លាំងក្លា នៅក្នុងសមុទ្រចិនខាងកើត និងកន្លែងដទៃទៀត»។
មីស៊ីលមហាល្បឿន XASM-3 កំពុងស្ថិតនៅក្រោមការអភិវឌ្ឍនៅឡើយ ប៉ុន្តែក្រុមអ្នករៀបចំផែនការរបស់យោធា បានស្នើនូវប្រភពធនធានហិរញ្ញវត្ថុសមល្មមមួយ ដើម្បីទិញ និងផលិតមីស៊ីលទាំងនោះរាប់រយដើម នៅក្នុងឆ្នាំសារពើពន្ធ ២០១៨។
XASM-3 នឹងក្លាយជាមីស៊ីលប្រឆាំងនាវាដំបូងគេបង្អស់ ដែលផលិតនៅប្រទេសជប៉ុន ហើយយន្តហោះចម្បាំងប្រភេទ F-2 នីមួយៗ នឹងដឹកមីស៊ីលប្រឆាំងនាវាថ្មី ចំនួន ២ ដើម។
គួរបញ្ជាក់ដែរថា ការទិញមីស៊ីលនេះ បានបង្ហាញពីតម្រូវការដើម្បីបង្កើនសមត្ថភាព និងលទ្ធភាព ក្នុងទប់ស្កាត់ការគំរាមកំហែង ដែលបង្កឡើងដោយកងទ័ពជើងទឹកចិន៕
មតិយោបល់