ជប៉ុន: ក្រុមមន្ត្រីបាននិយាយថា មនុស្ស ១២នាក់ ក្នុងនោះមានទាហាន ៨ នាក់ បានរងរបួសកាលពីថ្ងៃអង្គារ បន្ទាប់ពីត្រូវថ្មភ្នំភ្លើងហោះមកប៉ះចំ ក្នុងអំឡុងពេលភ្នំភ្លើង Kusatsu-Shirane បានផ្ទុះមួយរំពេច ខណ:ពួកគេកំពុងជិះស្គី នៅភាគកណ្តាលប្រទេសជប៉ុន ដោយក្រោយកើតហេតុ ទាហានម្នាក់បានស្លាប់បាត់បង់ជីវិត។ នេះបើយោងតាមសារព័ត៌មាន theprovince ចេញផ្សាយនៅថ្ងៃទី២៤ ខែមករា ឆ្នាំ២០១៨។
ទាហានរងគ្រោះទាំងនោះ គឺស្ថិតក្នុងក្រុមទាហាន៣០នាក់ ដែលកំពុងហ្វឹកហាត់ជិះស្គី នៅជិតកំពូលភ្នំភ្លើងដែលបានផ្ទុះនោះ។ ការផ្ទុះនេះ បានបង្កឲ្យមានភាពងងឹត ដោយមានផេះ និងថ្មភ្នំភ្លើងជាច្រើនបានរមៀលធ្លាក់មកក្រោម ដែលបង្ខំឲ្យពួកអ្នកជិះស្គីបានរត់ចុះមកខាងក្រោម។
សូមជំរាបថា ភ្នំភ្លើង Kusatsu-Shirane ស្ថិតនៅចម្ងាយ១៥០គីឡូម៉ែត្រពីភាគពាយព្យនៃទីក្រុងតូក្យូ ដែលវាបានផ្ទុះឡើងចុងក្រោយបំផុត កាលពីឆ្នាំ១៩៨៣ កន្លងទៅ៕
មតិយោបល់