ថៃ: យុវជនខ្មែរម្នាក់ បានធ្វើសកម្មភាពជួញដូរគ្រឿងញៀនរាប់ម៉ឺនគ្រាប់ ឆ្លងដែនពីកម្ពុជា ចូលទឹកដីថៃ ត្រូវបានក្រុមតម្រួតថៃ ស្ទាក់ចាប់ឃាត់ខ្លួនបាន កាលពីវេលាម៉ោង៤ល្ងាចថ្ងៃទី៨ ខែតុលា ឆ្នាំ២០១៦ តាមបណ្តោយខ្សែបន្ទាប់ព្រំដែនក្នុងទឹកដីថៃប្រមាណជា១០គីឡូម៉ែត្រ ពីខ្សែបន្ទាត់ព្រំដែន នៅលើកំណាត់ផ្លូវកែវភិតផ្លយ ស្ថិតក្នុងភូមិ៦ ឃុំខូកឡាន ស្រុកតាផាយ៉ា ខេត្តស្រះកែវ ប្រទេសថៃ។

ក្នុងប្រតិបត្តិការនោះ គឺខណ:ដែលកម្លាំងតម្រួតកំពុងល្បាតតាមដងផ្លូវ ក៏បានប្រទះឃើញមុខសញ្ញាសង្ស័យម្នាក់កំពុងស្ពាយកាបូបខ្មៅ ព្រមទាំងបានធ្វើដំណើរចាកចេញពីខ្សែបន្ទាត់ព្រំដែនឆ្ពោះឡើងទៅលើផ្លូវជាតិ ទើបកម្លាំងបានធ្វើការឃាត់ខ្លួនជាបណ្តោះអាសន្នដើម្បីត្រួតពិនិត្យ។

ក្រោយពីត្រួតពិនិត្យក្នុងកាបូបស្ពាយនោះ សមត្ថកិច្ចបានរកឃើញគ្រឿងញៀនប្រភេទយ៉ាម៉ាចំនួន៤សុង ដែលក្នុង១សុង មានគ្រឿងញៀន៥ដុំ ហើយក្នុង១ដុំ មានថ្នាំញៀនចំនួន១០កញ្ចប់ពណ៌ខៀវ និងក្នុង១កញ្ចប់មានថ្នាំញៀនចំនួន២០០គ្រាប់ ដូច្នេះបើសរុបរួមមានគ្រឿងញៀនចំនួន៤០០០០គ្រាប់(បួនម៉ឺនគ្រាប់) ទូរស័ព្ទដៃ១គ្រឿង និងម៉ូតូម៉ាកវេវ១គ្រឿងផងដែរ។

ជនសង្ស័យមានឈ្មោះ កៅ ហេង ភេទប្រុស អាយុ២៣ឆ្នាំ រស់នៅក្បែរចំណុចអូរ៣ជាន់ ក្នុងខេត្តបន្ទាយមានជ័យ ។ បន្ទាប់ធ្វើការសាកសួរជនសង្ស័យបានសារភាពថា ថ្នាំញៀនទាំងអស់នេះ គឺគេបានទទួលពីជនជាតិខ្មែរម្នាក់ មិនបានស្គាល់ឈ្មោះ ដោយគេបានកំណត់ឲ្យយកមកប្រគល់ឲ្យជនជាតិថៃ ដែលចាំទទួលក្បែរចំណុចខាងលើ។

ជនសង្ស័យបានបញ្ជាក់ថា ក្នុងការដឹកនាំគ្រឿងញៀនឆ្លងដែននេះ គឺគេទទួលបានប្រាក់កម្រៃចំនួន៥០០០០បាត ប៉ុន្តែមិនទាន់បានប្រគល់ដល់ដៃជនជាតិថៃនោះផង ក៏ត្រូវក្រុមតម្រួតថៃឃាត់ខ្លួនតែម្តង។

បច្ចុប្បន្នសមត្ថកិច្ចថៃបានបញ្ជូនខ្លួនជនសង្ស័យខាងលើ រួមទាំងវត្ថុតាងដ៏ច្រើនសន្ធឹកសន្ធាប់នេះ ទៅកាន់ស្នងការដ្ឋានខេត្តស្រះកែវ ដើម្បីចាត់វិធានការតាមផ្លូវច្បាប់៕