ព័ត៌មានអន្តរជាតិ

អាមេរិក កំពុងបង្ហាញសញ្ញានៃសង្គ្រាម ទាក់ទងនឹងនុយក្លេអ៊ែររបស់កូរ៉េខាងជើង មិនមែនកិច្ចចរចានោះទេ

កូរ៉េ: រដ្ឋមន្រ្តីក្រសួងការបរទេសកូរ៉េខាងជើង បានសង្កត់ធ្ងន់ថា ក្រុងព្យុងយ៉ាង នឹងមិនបោះបង់កម្មវិធីនុយក្លេអ៊ែររបស់ខ្លួន ក្រោមលក្ខខណ្ឌណាមួយឡើយ ខណ:ដែលអាមេរិក កំពុងតែបង្ហាញសញ្ញានៃសង្គ្រាម ដោយលោករដ្ឋមន្រ្តី បានលើកទ្បើងថា ប្រសិនបើអាមេរិកចង់ឲ្យរបបខ្លួនឈប់វានោះ ក្រុងវ៉ាស៊ីនតោន គួរតែបញ្ឈប់សកម្មភាពអមិត្តរបស់ខ្លួនជាមុនសិន។ នេះបើយោងតាមសារព័ត៌មាន RT ចេញផ្សាយនៅថ្ងៃទី១២ ខែតុលា ឆ្នាំ២០១៧។

អ្នកនាំពាក្យកំពូលកូរ៉េខាងជើង បាននិយាយថា អាមេរិក បានបង្ហាញសញ្ញានៃសង្គ្រាម ជាមួយការគំរាមកំហែងសកម្មភាពយោធាជាច្រើនលើក មកលើទីក្រុងព្យុងយ៉ាង បន្ទាប់ពីប្រធានាធិបតីអាមេរិក លោក ដូណាល់ ត្រាំ បានប្រមាថ និងចោទប្រកាន់មេដឹកនាំកូរ៉េខាងជើង លោក គីម ជុងអ៊ុន ទាក់ទងនឹងការប្រើអាវុធបង្កហេតុ។

ប្រភពដដែលបានបញ្ជាក់ថា ក្រុងព្យុងយ៉ាង នឹងនៅតែអភិវឌ្ឍកម្មវិធីនុយក្លេអ៊ែរ និងមីស៊ីល​បន្តទៀត ហើយឃ្លាំងអាវុធនុយក្លេអ៊ែររបស់ខ្លួន នឹងត្រូវបានប្រើដើម្បីជួយទប់ស្កាត់ និងធានាសន្តិភាព និងសន្តិសុខនៅក្នុងតំបន់ ក៏ដូចសិទ្ធិក្នុងការការពារប្រជាជាតិខ្លួនផងដែរ។

សូមជំរាបថា បើទោះបីមានការដាក់ទណ្ឌកម្ម ពីក្រុមប្រឹក្សាសន្តិសុខអង្គការសហប្រជាជាតិ ដើម្បីរឹតបន្តឹងផ្នែកសេដ្ឋកិច្ច លើក្រុងទីព្យុងយ៉ាងឲ្យបង់បោះកម្មវិធីអាវុធរបស់ខ្លួនយ៉ាងណាក៏ដោយ កូរ៉េខាងជើងនៅតែបន្តគឃ្លើនធ្វើតេស្តនុយក្លេអ៊ែរឥតឈប់ឈរ៕

មតិយោបល់