អតីតម្ចាស់ផលិតរស្មីស្ទឹងសង្កែ បានហៅតារាចម្រៀង ល្បីៗ ក្នុងផលិតកម្មធំមួយឈរ​ឈ្មោះកំពូល ជា​តារាចម្រៀង ឬកូនរមិលគុណ បន្ទាប់ពីតារាទាំងនោះ មិនបានទៅចូលរួម​កម្មវិធីចម្រើនព្រះជន្មរបស់លោកស្រី​កាលពីថ្ងៃទី​១៩ -២០ ខែវិច្ឆិកា​។​

ស្របពេលដែល​តារា​ចម្រៀងល្បីៗ ជាច្រើនដួង ធ្លាប់ជ្រកក្នុងទ្រនំ​រស្មីស្ទឹងសង្កែ មានដូចជា សុគន្ធ និសា សាន ផានិត និង ឈឿន ឧត្តម កញ្ញា នី មុន្នីនាថ និង លោក អេនឌី ជាដើម បានស្កាត់ទៅចូលរួម​ពិធីចម្រើនព្រះជន្មលោកស្រី ស៊ូរ វ៉ាន់នី ដែលមានងារ​ជាជំទាវ នៅលើទឹកដីបាត់ដំបងនោះ តែ​អ្វីដែលធ្វើឲ្យគេចាប់អារម្មណ៍មាន​តារាចម្រៀង​ល្បីៗ នៅហង្សមាស ប៉ុន្មានដួង បែរ​ជាមិនទៅចូលរួមវិញ ។​

ចំណុចនេះ បានធ្វើឲ្យ លោកស្រី ស៊ូរ វ៉ាន់នី មានអារម្មណ៍ឈួលដល់ចុងច្រមុះ ដោយ​ទម្លាយអារម្មណ៍ ចេញពីបេះដូង ភ្លាមៗ នៅលើហ្វេសប៊ុក ដៀមដាមទៅលើ​តារាចម្រៀង​ប៉ុន្មានដួងនោះ ។

អ្នកស្រី បានសរសេរថា «កូនដឹងគុណ ឯកូនរមិលគុណហៅមិនមក រវល់ស្គាល់លុយធំ បើមកបុណ្យខ្ញុំវាអត់បានលុយ ភ្លេចគ្រាកន្លងអូសកង់ ដើរផងអត់អីជិះ ឥឡូវជិះឡាន បានភ្លេចគុណ » ។​ លោកស្រី បានបន្តថា អ្នកល្បីខ្លះទៀត ចិត្តចោរម្សៀតប្រាប់ថាមក ដល់ថ្ងៃមិនមកកក់ Hotel ចោលអ្នកភ្លេចស្រមោលអតីតកាល គ្មាននរណាស្គាល់ ដល់អ្នកធំភ្លេច​អ្នកបញ្ចុក សំរុករកលុយ តែមិនថ្វីទេសុំអ្នកល្បី បន្ត អំពើល្អរបស់ខ្ញុំសូមតែបុណ្យ។​

ទោះជាយ៉ាងណា អ្នកស្រីមិនបានបង្ហើបថា តារាចម្រៀង​នោះ ជានរណានោះទេ ប៉ុន្មាន ប្រិយមិត្តអ្នកលេង​ហ្វេសប៊ុក និង​អ្នកតាមដានសង្គមសិល្បៈ​ ពិតជា​ដឹងច្បាស់ណាស់ ថាជា​តារាដួងណានោះជានរណា ធ្លាប់ជ្រកក្នុងទ្រនំ ផលិតកម្ម រស្មីស្ទឹងសង្កែ (RSK) ៕​